რაბათში ბექა პირველის ძეგლი დაიდგმება

ძეგლის სიმაღლე ხუთი მეტრი იქნება და ის, სავარაუდოდ, „ახალციხის ციხესთან“ მდებარე ტერასაზე დაიდგმება.

1285-1306 წლებში სამცხის მმართველისა და სამართლის წიგნის ( „წიგნი სამართლისა კაცთა შეცოდებისა ყოვლითავე“ ) შემდგენის ბექა ჯაყელის ძეგლის შესაქმნელად საკონკურსო კომისია თითქმის შექმნილია.

„კომისიის შექმნაზე მუშაობა თითქმის დავასრულეთ. კონკურსს მალე გამოვაცხადებთ, მასში მონაწილეობას მიიღებენ მოქანდაკეები, მხატვრები“, - ამბობს ახალციხის მერი გიორგი კოპაძე.

მისი თქმით, კონკურსში გამარჯვებული პროექტის მოსამზადებლად 30 000 ლარს მიიღებს, ძეგლის შესასრულებლად კი 120 000.

„საკონკურსო პირობებში ჩავდებთ, რომ ბექა პირველს უნდა ეცვას ქართული ტანსაცმელი, მესხური ორნამენტებით, ასევე აუცილებელი პირობა იქნება, რომ ხელში ეჭიროს წიგნი. ეს იმიტომ რომ იგი სამართლის წიგნის შემდგენი იყო“, - აცხადებს კოპაძე და ამატებს, რომ ძეგლი მომავალი წლის 30 ივნისისთვის, ანუ ახალციხელობის დღისთვის, უკვე მზად იქნება.
ქალაქის მერია, გარდა ბექა პირველისა რაბათში სხვა ძეგლების დადგმასაც გეგმავს.

„რაბათში რომ შედიხარ დაუმთავრებელის შთაბეჭდილებას ტოვებს. ამიტომ გვინდა რომ მესხი მოღვაწეების ძეგლები დავდგათ, რომლებიც შედარებით პატარა, დაახლოებით მეტრანახევრიანები იქნება. რა თქმა უნდა ეს ძეგლებიც კონკურსის წესით დაიდგმება“, - ამბობს გიორგი კოპაძე.

ახალციხის მერს ქალაქში შალვა ახალციხელის ძეგლის დადგმაც სურს, თუმცა ამბობს, რომ ამ საკითხის შეთანხმება ჯერ საპატრიარქოსთან მოუწევს: „შალვა ახალციხელი წმინდანია და ეკლესიას ძეგლებთან დაკავშირებთ სხვა დამოკიდებულება აქვს. ამიტომ შესაძლოა, რომ კანონიკურ სტილში შესრულდეს ეს ძეგლი და ამაზე დაგვთანხმდეს ეკლესია“.

[თამუნა უჩიძე, ახალციხე]