თამარაშვილის შთამომავლის სახლში შენახულმა მემორიალურმა დაფამ მუზეუმში გადაინაცვლა

თამარაშვილის შთამომავლებს დაფა 2011 წელს, ვატიკანის ელჩმა ქეთევან ბაგრატიონმა უსახსოვრა. ამ დრომდე იგი ანზორ თამარაშვილის ოჯახში ინახებოდა.

”ციხეზე რესტავრაცია მიმდინარეობდა და ველოდებოდით მის დასრულებას, რომ მუზეუმისთვის გადმოგვეცა. ვფიქრობთ, რომ მისი ადგილი სამცხე-ჯავახეთის ისტორიულ მუზეუმშია”,-ამბობს მიხეილ თამარაშვილი.

შეგახსენებთ, რომ 2011 წელს მიხეილ თამარაშვილის გარდაცვალებიდან 100 წელი შესრულდა. საიუბილეო წელს არაერთი ღონისძიება ჩატარდა, არამარტო საქართველოში, არამედ იტალიაშიც, სადაც სტუმრის სტატუსით თამარაშვილის შთამომავლებიც იმყოფებოდნენ.

იტალიელებმა მიხეილ თამარაშვილის მემორიალური დაფა 1912 წელს, გარდაცვალებიდან მეორე წელს დაუდგეს.

სამცხე-ჯავახეთის ისტორიულ მუზეუმში მიხეილ თამარაშვილის არაერთი პირადი თუ საზოგადოებრივი დოკუმენტი ინახება. მუზეუმშია დაცული მისი გამოკვლევები და არქივი.

[თინათინ ზაზაძე, ახალციხე]