სამცხე–ჯავახეთის უნივერსიტეტში მიხეილ თამარაშვილის 160 წლის იუბილე აღნიშნეს

„ცოტახნისწინ ქალაქში ჩვენმა სტუდენტებმა გააჩერეს ახალგაზრდები და ჰკითხეს – ვინ არის მიხეილ თამარაშვილი? ათიდან ორმა ძლივს თქვა. პატივი უნდა ვცეთ იმ ისტორიას, წარსულს, რომელმაც ჩვენი სამშობლო აქამდე შეგვინახა. მიხეილ თამარაშვილმა ქართული საეკლესიო ისტორია შექმნა“, – ამბობს აკადემიკოსი მერაბ ბერიძე.

სემინარი 1978 წელს რეზო თაბუკაშვილის მიერ მიხეილ თამარაშვილის მოღვაწეობის შესახებ გადაღებული ფილმის „კვალი ნათელის“ ჩვენებით დაიწყო. პროფესორ–მასწავლებლებთან და სტუდენტებთან ერთად სემინარს მოსწავლეებიც ესწრებოდნენ.

„მიხეილ თამარაშვილის შესახებ ისტორიის მასწავლებელმა მოგვიყვა და დაგვაინტერესა, ამიტომ მოვედით, რომ მისი მოღვაწეობის შესახებ მეტი გავიგოთ“, – გვითხრა მეექვსე საჯარო სკოლის მოსწავლემ სოსო აღლემაშვილმა.



სემინარის დასრულების შემდეგ, 18:00 საათზე რეზო თაბუკაშვილის სახელობის სახალხო ლიტერატურულმა თეატრმა, უნივერსიტეტის სააქტო დარბაზში, მიხეილ თამარაშვილის შესახებ სპექტაკლი გამართა.

ქართველი მეცნიერი, თეოლოგიის დოქტორი, რომის კათოლიკური ეკლესიის აბატი და საზოგადო მოღვაწე მიხეილ თამარაშვილი, 1858 წელს ახალციხეში, რაბათის უბანში, ქართველ კათოლიკეთა მრავალშვილიან ოჯახში დაიბადა.

მისმა სამეცნიერო ნაშრომმა, რომელიც საქართველოში კათოლიკური სარწმუნოების გავრცელებას ეხება, ასევე, ფრანგულ ენაზე გამოცემულმა წიგნმა „ქართული ეკლესიის ისტორია“, მეოცე საუკუნის დასაწყისში საქართველოს ევროპის ქვეყნებში დიდი პოპულარობა მოუტანა.

[ავთო ინასარიძე, ახალციხე]