ადიგენში ხანძრის შედეგად 2 წლის ბავშვი დაიწვა

ორი წლის ბავშვი კატასტროფის მედიცინის ცენტრმა მომხდარიდან მალევე თბილისში, საავადმყოფოში გადაიყვანა. როგორც ბაბუა ამბობს, პატარას ჯანმრთელობის მდგომარეობა მძიმეა.

„ყველაფერი გაუკეთეს, რაც საჭირო იყო, მაგრამ ძალიან მძიმე მდგომარეობაა, ექიმები ვერ ამბობენ, გადარჩება თუ არა“, – ამბობს ბავშვის ბაბუა ნუგზარ ანთაძე. პატარა მისი ქალიშვილის შვილია. გოგონა, რომელიც ახალქალაქშია გათხოვილი, მშობლებთან სტუმრად იყო.

ანთაძეების სახლს ხანძარი გუშინ, 2 თებერვალს დილით, დაახლოებით, 11:00 საათზე გაუჩნდა. ცეცხლი სახურავში გაჩნდა. ამ დროს პატარას სახლის მეორე სართულზე, ერთ–ერთ ოთახში ეძინა.

„ბავშვი დააძინა დედამისმა და ხუთი წუთით ჩამოვიდა ქვევით. ძლიერი ქარი იყო და ცეცხლი ღუმელის მილს სახურავიდან ჩაეკიდა, ოთახში პლასტმასები იყო და ხანძარი მალე მოედო. კარები შევამტვრიეთ, მაგრამ ბავშვი უკვე ცუდ მდგომარეობაში იყო“, – ამბობს ნუგზარ ანთაძე.

სახლში ორი ოთახი ავეჯთან ერთად დაიწვა. მეორე სართულზე ორი ოთახი და ასევე სახურავი გადარჩა.

„პოლიციაც მალე მოვიდა და სახანძროც. მეზობლებიც ეხმარებოდნენ ჩაქრობაში“, – ამბობს ზანავის ტერიტორიულ ორგანოში გამგებლის წარმომადგენელი გივი ანძაველიძე.

მომხდარზე ადიგენის რაიონულმა სამმართველომ ძიება სსკ–ის 187–ე მუხლით დაიწყო, რაც ნივთის დაზიანებას ან განადგურებას გულისხმობს.

[თამუნა უჩიძე, ადიგენი]