‘ბავშვი ოთახში, კარადაში ნახეს დამწვარი’, – რას ყვებიან ადგილობრივები ნაქალაქევში მომხდარ შემთხვევაზე

ადგილობრივების თქმით, ნაქალაქევში ა.ბ–ის საცხოვრებელ სახლს ხანძარი სავარაუდოდ ელექტროგაყვანილობის გაუმართაობის გამო გაუჩნდა.

„სოფელში დენი არ იყო და დაახლოებით იმ დროს მოვიდა, როცა სახლს ცეცხლი გაუჩნდა. პირველი სახურავს წაეკიდა. იმ ოთახში სადაც ბავშვი იყო, ჭერზე პლასმასი იყო გაკრული და ცეცხლი უცებ მოედო“, – აცხადებენ სოფელში.

ადგილობრივების თქმით, იმ დროს, როდესაც ცეცხლი გაჩნდა, სახლში მარტო ორი მცირეწლოვანი იმყოფებოდა, დედა ეზოში საქმიანობდა:„უფროსმა შვილმა დაუძახა, დედა სახლს ცეცხლი უკიდიაო. დედა შევარდა, მაგრამ ბოლი იყო და პატარა ვერსად ნახა. მეზობლის ბიჭიც ეძებდა, მაგრამ უშედეგოდ. ბოლოს ბავშვი ოთახში, კარადაში ნახეს დამწვარი, სავარაუდოდ, ვიდრე დაიწვებოდა მანამდე ბოლით გაიგუდა“.

მათივე ინფორმაციით, კვამლისგან ჯანმრთელობა გაუუარესდათ დედას, მცირეწლოვან პატარას და მეზობელს, რომელიც ოჯახის დახმარებას ცდილობდა: „სასწრაფო – სამედინიცო დახმარების ბრიგადამ დაშავებულებს ადგილზე გადასხმები გაუკეთა“.

სოფელ ნაქალაქევში ხანძარი დღეს, საღამოს მოხდა. ხანძრის შესახებ ასპინძის სახანძრო–სამაშველო სამსახურში შეტყობინება 16:38 საათზე შევიდა.

„შეტყობინებიდან 40 წუთში ხანძარი უკვე ლიკვიდირებული იყო. სავარაუდოდ, ბავშვი როდესაც დაიწვა, ოჯახის წევრებმა მაშინ შეიტყვეს, რომ სახლს ცეცლი ეკიდა“, – აცხადებენ ასპინძის სახანძრო–სამაშველო სამსახურში.

შსს–ში აცხადებენ, რომ მომხდარზე ძიება 187–ე მუხლის მესამე ნაწილით დაიწყო, რაც გულისხმობს ნივთის დაზიანებას ან განადგურებას ცეცხლის წაკიდებით, რამაც გამოიწვია ადამიანის სიცოცხლის მოსპობა ან სხვა მძიმე შედეგი.

შემთხვევის ადგილზე ამ დრომდე მუშაობენ ექსპერტ–კრიმინალისტები.

[თინათინ ზაზაძე, ასპინძა]