იაკობაძეებს, რომლებსაც ბინა სააღსრულებომ გაუყიდა, სახელმწიფო ვერ დაეხმარება

სოციალურად შეჭირვებული გულთამზე იაკობაძე, რომელიც ახალციხეში, ვაჟა-ფშაველას N30–ში, მეთორმეტე კლასელ გოგონასთან ერთად ამ დრომდე ცხოვრობს, ამბობს რომ ბინა იძულების წესით ყოველ წუთს შეიძლება დაატოვებინონ.

ოჯახის დიასახლისი, ერთადერთ შვილთან ერთად, ეკონომიკური პრობლემების გამო პერიოდულად თურქეთში სამუშაოდ დადის. სწორედ ამ მიზეზის გამო, მათ ფორმა სამი დაედოთ. რაც იმას ნიშნავს, მათთან გადასამოწომებლად სამჯერ მისულ სოციალურ აგენტს შინ არავინ დახვდა და უფლებამოსილ პირთან შეხვედრა ვერ მოხერხდა.

„იაკობაძეებს ფორმა სამი ნოემბრიდან დაედოთ. 2014 წლის აგვისტომდე კი დახმარების მიმღებები იყვნენ“, – გვიხსნიან შრომის, ჯანმრთელობისა და სოციალური დაცვის სამინისტროში.

აღნიშნულ უწყებაში აცხადებენ, რომ მსგავს ვითარებაში (ანუ როცა სოციალურად შეჭირვებულს ბინას აუქციონის წესით უყიდიან) სოციალური სააგენტო უძლურია: „სამწუხაროდ, ჩვენ არაფერი შეგვიძლია, გარდა იმისა, რომ გადამოწმების შემდეგ ისევ დახმარება დავუნიშნოთ. ოღონდ ოჯახი რაღაც კონკრეტულ მისამართზე უნდა იყოს, რომ მისი გადამოწმება მოხდეს“.

იაკობაძეების დახმარება არც ადგილბრივ თვიმმათველობას შეუძლია. ახალციხის მერიაში აცხადებენ, რომ ამ ეტაპზე, თუნდაც დროებითი თავშესაფრის გამოყოფა არსად შეუძლიათ.

„თუ რაიმე საშუალება გამოჩნდა, ბუნებრივია დავეხმარებით“, – ამბობს ახალციხის მერის მოადგილე ზაზა გელაძე.

იაკობაძეების საქმეში სახალხო დამცველის აპარატი ჩაერთო.

შეგახსენებთ, რომ სოციალურად შეჭირვებული იაკობაძეების ბინა სააღსრულებო ბიურომ აუქციონის წესით გაყიდა. იმისთვის რომ ბინა არ გაყიდულიყო, იაკობაძეებს 8 000 დოლარი და 396 ლარი უნდა გადაეხადათ, თუმცა ამის დაფარვა ვერ შეძლეს. ოჯახის დიასახლისი ირწმუნება, რომ მის მეუღლეს ბინა თაღლითურად სხვის სახელზე გადააფორმებინეს.

[თამუნა უჩიძე, ახალციხე]