სოციალურად დაუცველ გოგოლაძეებს წნისში ნაქირავები ბინა დაატოვებინეს

გელა გოგოლაძემ მეუღლესთან ერთად წნისში ნაქირავები ბინა იძულებით დატოვა.

„ქირა ვეღარ გადავიხადეთ და დაგვაცლევინეს“, – ამბობს იგი.

ამჟამად გოგოლაძეები თავს გოგოლაძის მეუღლის, მანანა ჯვარიძის მეგობრის ბინაში, ვალეში გვარამაძის N28–ში აფარებენ. თუმცა, მისი დაცლაც თვენახევარში მოუწევთ.

„ბინის პატრონი თბილისშია, თვენახევარში ჩამოვა და ბინა უნდა დავცალოთ, მაგრამ წასასვლელი არსად გვაქვს“, – ამბობს გელა გოგოლაძე.
გელა გოგოლაძეს შაქარი, მის მეღულეს კი სიმსივნე აქვს. გოგოლაძემ საავამდყოფო დღეს, 10 აპრილს დატოვა. ამბობს, რომ ბოლო დროს მდგომარეობა მის მეღულესაც გაურთულდა.

„გამგებელთან ვიყავი რამდენიმე დღის წინ. წნისში ფიცრული სახლი იყიდება 1500 ლარად და ვთხოვე შეესყიდა ჩვენთვის, მაგრამ უარი მითხრა“, – აცხადებს გოგოლაძე.

ახალციხის მუნიციპალიტეტის გამგებელი ზაზა მელიქიძე აცხადებს, რომ ბიუჯეტი სოციალურად დაუცველებისთვის ბინის შესყიდვის საშუალებას არ აძლევთ, უახლოეს დღეებში კი გოგოლაძეებს თავშესაფარს შესთავაზებს: „ვალეში ვეძებთ დაცლილ ბინებს, ამ დროისთვის დაახლოებთ 7–8 ოჯახია, ვისაც სასწრაფოდ დახმარება სჭირდება, სახლი არ აქვს და ვერც ქირას იხდის“.

მელიქიძის განცხადებით, გამგეობა გოგოლაძეებს სააღდგომოდ გათვალისწინებული სოციალური პაკეტით გუშინ, 9 აპრილს დაეხმარა.

შეგახსენებთ, რომ გოგოლაძეები უკიდურეს გაჭირვებაში სოფელ წნისში ნაქირავებ ბინაში მას შემდეგ ცხოვრობენ, რაც შვილის გამო ბინის გაყიდვა მოუხდათ, ავადმყოფობის გამო კი ბინის ყიდვა ვეღარ შეძლეს. ოჯახის ერთადერთი შემოსავალი 150–ლარიანი პენსიაა.

იხილეთ, „სამხრეთის კარიბჭეს“ მიერ ამ თემაზე მომზადებული სიუჟეტი და ფოტოისტორია.

[თამუნა უჩიძე, ახალციხე]