შპს ‘მექანიზატორის’ ახალციხის სერვისცენტრის მენეჯერი ბრალს აღიარებს

ქუთაისის საქალაქო სასამართლოში აცხადებენ, რომ შპს „მექანიზატორის“ ახალციხის სერვისცენტრის ბრიგადის მენეჯერი ივანე სარალიძე წარდგენილ ბრალს აღიარებს. აქ მას დაკავებულ ოთხ პირთან ერთად აღკვეთის ღონისძიებად გირაო 20 000 ლარი შეეფარდა.

პროკურატურამ ქუთაისის საქალაქო სასამართლოს გადაწყვეტილება სააპელაციოში გაასაჩივრა, ბრალდების მხარე ორივე ინსტანციაში პატიმრობას ითხოვდა. საქართველოს მთავარ პროკურატურაში აცხადებენ, რომ მათი საჩივარი სააპელაციო სასამართლომ არ დააკმაყოფილა და ძალაში ქუთაისის საქალაქო სასამართლოს გადაწყვეტილება დარჩა.

როგორც შპს „მექანიზატორის“ ახალციხის სერვიცენტრის მმართველი კახა ჩინჩალაძე აცხადებს, სარალიძეს უფლებამოსილება უკვე შეუწყდა.

შეგახსენებთ, რომ საქართველოს მთავარმა პროკურატურამ სახელმწიფო ქონების გაფლანგვისა და მითვისების ფაქტზე ივანე სარალიძესთან ერთად ზესტაფონის სერვისცენტრის კიდევ ოთხი თანამშრომელი დააკავა. პროკურატურის ინფორმაციით, ბრალდებულები „მექანიზატორის“ ოპერატორებს ამავე საწარმოს ტექნიკით ფერმერებს ხვნის ბარათებისა და შესაბამისი ხელშეკრულებების გარეშე უსრულებდნენ სხვადასხვა სასოფლო-სამეურნეო სამუშაოებს. ხოლო აღნიშნული სამუშაოებისთვის მიღებულ თანხას ნაცვლად სახელმწიფო ბიუჯეტში შეტანისა, ხელზე იღებდნენ და ინაწილებდნენ.

მათ ბრალი სსკ–ის 182-ე მუხლის მე-2 ნაწილის „ა“, „გ“ და „დ“ და მე-3 ნაწილის „ა“ და „ბ“ ქვეპუნქტებით ედებათ, რაც სახელმწიფო ქონების გაფლანგვისა და მითვისებას გულისხმობს.

[თამუნა უჩიძე, ახალციხე]