შპს „მექანიზატორის“ თანამშრომლები ბრიგადის მენეჯერის დაკავებაზე

შპს „მექანიზატორის“ ახალციხის სერვისცენტრის ბრიგადის მენეჯერი, ბორჯომის მკვიდრი ივანე სარალიძე ორი წელია რაც აღნიშნულ პოზიციაზე მუშაობს.

თანამშრომლებს მისი დაკავება უკვირთ და ფიქრობენ, რომ შესაძლოა, რაიმე გაუგებრობას ჰქონდეს ადგილი.

„რა იყო და როგორ ეგ ჯერ გარკვეული არ არის. დაველოდოთ მოვლენებს. ამ ეტაპზე არაფრის თქმა არ შემიძლია“, – ამბობს მექანიზაციის სერვისცენტრის მმართველი კახა ჩინჩალაძე.

პროკურატურის ინფორმაციით, სარალიძე ზესტაფონის სერვის ცენტრის თანამშრომლებთან ერთად ოპერატორებს ნაკვეთებს ახვნევინებდა, ფულს კი ხელზე იღებდა.

ახალციხის სერვისცენტრის ტრაქტორის ოპერატორები ირწმუნებიან, რომ მსგავს ფაქტს ადგილი არასდროს ჰქონია.

„ოთხი წელი ვიმუშავე მანდ, სარალიძესთან ერთად კი წელიწად ნახევარზე მეტი. ეგეთი არასდროს არაფერი ყოფილა. ივანე მაძლევდა დავალებას იმ ხელშეკრულების მიხედვით, რაც სერვისცენტრში შემოდიდოა“, – ამბობს ტრაქტორის ყოფილი ოპერატორი თორნიკე ბარძიმაძე და ამატებს, რომ ნაკვეთში მოსახნავად მხოლოდ მას შემდეგ შედიოდნენ, რაც გლეხი მათ ბანკში გადახდილი თანხის დამადასტურებლად ქვითარს უჩვენებდა – „ თუ ქვითარი არ ჰქონდა, არც ვხნავდით–ხოლმე“.

ბარძიმაძეს ეთანხმება შპს მექანიზატორის ტრაქტორის ოპერატორი ნოდარ ქოზაშვილი: „ეგეთი რამ ჩვნეთან არასდროს გაუკეთებია, მისი უკმაყოფილოც არასდროს არავინ ყოფილა. ძირითადად საგაზაფხულო ბარათებით ვხნავდით, ხელშეკრულებები იშვიათად შემოდიოდა. ყოფილა შემთხვევაც, როცა ჯერ მოგვიხნია და გლეხს ფული ბანკში ამის შემდეგ გადაურცხია“.

შეგახსენებთ, რომ საქართველოს მთავარმა პროკურატურამ სახელმწიფო ქონების გაფლანგვისა და მითვისების ფაქტზე ივანე სარალიძესთან ერთად ზესტაფონის სერვისცენტრის კიდევ ოთხი თანამშრომელი დააკავა. პროკურატურის ინფორმაციით, ბრალდებულები „მექანიზატორის“ ოპერატორებს ამავე საწარმოს ტექნიკით ფერმერებს ხვნის ბარათებისა და შესაბამისი ხელშეკრულებების გარეშე უსრულებდნენ სხვადასხვა სასოფლო-სამეურნეო სამუშაოებს. ხოლო აღნიშნული სამუშაოებისთვის მიღებულ თანხას ნაცვლად სახელმწიფო ბიუჯეტში შეტანისა, ხელზე იღებდნენ და ინაწილებდნენ.

მათ ბრალი სსკ–ის 182-ე მუხლის მე-2 ნაწილის „ა“, „გ“ და „დ“ და მე-3 ნაწილის „ა“ და „ბ“ ქვეპუნქტებით ედებათ, რაც სახელმწიფო ქონების გაფლანგვისა და მითვისებას გულისხმობს.

[თამუნა უჩიძე, ახალციხე]