შპს "მექანიზატორის" ახალციხის სერვისცენტრის ბრიგადის მენეჯერს აღკვეთის ღონისძიებად გირაო შეეფარდა

ქუთაისის საქალაქო სასამართლოში განმარტავენ, რომ შპს "მექანიზატორის" ახალციხის სერვისცენტრის ბრიგადის მენეჯერს ივანე სარალიძეს, ასევე ამავე სამსახურის თანამშრომლებს იმერეთში: დავით ხუსკივაძეს, გრიგოლ გელხვიიძეს, ვარლამ ბარამაძესა და ავთანდილ ლომინაშვილს აღკვეთის ღონიძეიბად გირაო 20 000 – 20 0000 ლარი შეეფარდათ. თუმცა, ბრალდებულებზე პროკურატურა პატიმრობას ითხოვდა.

აღკვეთის ღონისძიების შეფარდებაზე ქუთაისის საქალაქო სასამართლომ 16 იანვარს იმსჯელა.

შეგახსენებთ, რომ საქართველოს მთავარმა პროკურატურამ სახელმწიფო ქონების გაფლანგვისა და მითვისების ფაქტზე ივანე სარალიძესთან ერთად ზესტაფონის სერვისცენტრის კიდევ ოთხი თანამშრომელი დააკავა. პროკურატურის ინფორმაციით, ბრალდებულები „მექანიზატორის“ ოპერატორებს ამავე საწარმოს ტექნიკით ფერმერებს ხვნის ბარათებისა და შესაბამისი ხელშეკრულებების გარეშე უსრულებდნენ სხვადასხვა სასოფლო-სამეურნეო სამუშაოებს. ხოლო აღნიშნული სამუშაოებისთვის მიღებულ თანხას ნაცვლად სახელმწიფო ბიუჯეტში შეტანისა, ხელზე იღებდნენ და ინაწილებდნენ.

მათ ბრალი სსკ–ის 182-ე მუხლის მე-2 ნაწილის „ა“, „გ“ და „დ“ და მე-3 ნაწილის „ა“ და „ბ“ ქვეპუნქტებით ედებათ, რაც სახელმწიფო ქონების გაფლანგვისა და მითვისებას გულისხმობს.

[თამუნა უჩიძე, ახალციხე]