![ნინოწმინდაში მომხდარი მკვლელობის საქმეზე ა/ო–ს ხელმძღვანელი ქეთევან ხმალაძე დააკავეს ნინოწმინდაში მომხდარი მკვლელობის საქმეზე ა/ო–ს ხელმძღვანელი ქეთევან ხმალაძე დააკავეს](/uploads/posts/2016-01/1453049075_1463022_699383670080966_1776604406_n.jpg)
ქეთევან ხმალაძე ერთ–ერთია ნინოწმინდაში მომხდარი მკვლელობის საქმეზე დაკავებულ ხუთ პირს შორის. არცერთ მათგანს ჯერ ბრალი არ წარდგენია, თუმცა ხმალაძეს სსკ–ის 179–ე მუხლის მეოთხე ნაწილის ა ქვე პუნქტით გათვალისწინებული დანაშაულის ჩადენას ედავებიან, რაც ორგანიზებული ჯგუფის მიერ ყაჩაღობას გულისხმობს და ისჯება თავისუფლების აღკვეთით ვადით თერთმეტიდან თხუთმეტ წლამდე.
დანარჩენი დაკავებული ოთხი პირიდან ორს ყაჩაღობას, ერთს მკვლელობასა და ყაჩაღობას, ერთს კი დანაშაულის შეუტყობინებლობას ედავებიან.
როგორც სამცხე–ჯავახეთის პროკურატურაში განმარტავენ, მათ ბრალი დღეს, 18 იანვარს წარედგინებათ.
ადგილობრივები ამბობენ, რომ ხმალაძე რამდენიმე კაცთან ერთად სოფელ ტყემლანაში დააკვეს: „სროლები იყო. ამბობენ რომ შეფარებული ჰყოლია კრიმინალები. ალბათ მათაც იარაღი ჰქონდთ“.
შეგახსენებთ, შემთხვევა ნინოწმინდაში 13 იანვარს, საღამოს მოხდა. სააგენტო
Jnews.ge-ს ინფორმაციით, საღამოს, დაახლოებით 18:00 საათზე, ნინოწმინდაში მცხოვრებ ბაგრატ ს.–ს სახლის კარზე კაკუნი გაისმა. ამ დროს სახლში ბაგრატ ს.–ს დედა და მეუღლე იმყოფებოდნენ. მეუღლემ, რომელიც კარის გასაღებად გაემართა, კარების დარტყმის გამო გონება დაკარგა, როგორც კი გონს მოვიდა, დასახმარებლად დაიწყო რეკვა, ამ დროს მძარცველები გაიქცნენ. შემთხვევის შედეგად გარდაცვლილი ნახეს ბაგრატ ს.–ს დედა, რომელსაც ყელის არეში რამდენიმე ჭრილობა აქვს მიყენებული.
ბაგრატ ს.ნინოწმინდაში ვალუტის გადაცვლაზე მუშაობს. მძარცველებს მისი სახლიდან არაფერი წაუღიათ.
შინაგან საქმეთა სამინისტრომ ნინოწმინდაში შუახნის ქალის მკვლელობის საქმეზე
ხუთი პირი 16 იანვარს დააკავა. გამოძიება განზრახ მკვლელობის ფაქტზე, სსკ-ის 108-ე მუხლით მიმდინარეობს.
შეგახსენებთ, რომ ქეთევან ხმალაძე 2012 წელს დაფუძნებულ არასამთავრობო ორგანიზაციას „ერთსულოვნება სამართლიანობისკენ“ ხელმძღვანელობდა. 2014 წლის 24 ივლისს ქალაქ ახალციხის მუნიციპალიტეტის მერიის მონიტორინგის შიდა კონტროლის საკითხებში მთავარ სპეციალისტად დაიწყო მუშაობა, თუმცა აქ მცირე ხანს დაჰყო. მერიის შემდეგ მან მუშაობა კვლავ აღნიშნული ორგანიზაციის ხელმძღვანელად გააგრძელა.
„ერთსულოვნება სამართლიანობისკენ“ ბოლო დროს აღარ გამოჩენილა. მისი ერთ–ერთი დამფუძნებელი გენადი ენდელაძე აცხადებს, რომ ორგანიზაციის შესახებ ინფორმაცია არ აქვს.
ქეთევან ხმალაძეს რამდენიმე ხმაურიანი საქმე უკავშირდება. მისივე ორგანიზაციის ყოფილი თანამშრომლები მას ტყუილში ადანაშაულებდნენ. ამბობდნენ, რომ მაშინ როცა ხმალაძე მერიაში მუშაობდა, მათ
დასაქმებას ჰპირდებოდა, ეს ტყუილი კი იმისთვის სჭირდებოდა, რომ სანაცვლოდ, დასაქმების მოლოდინში მყოფებისგან გარკვეულ სარგებელს ღებულობდა.
ხმალაძეს 2013 წლის 27 ოქტომბრის საპრეზიდენტო არჩევნებზე მათი ორგანიზაციის დამკვირვებლებისთვის განკუთვნილი
თანხის მითვსებაშიც ადანაშაულებდნენ. ასევე, ქეთევან ხმალაძე იყო ინიციატორი
იმ შეხვედრის, რომელიც 2014 წლის დეკემბერში „სამხრეთის კარიბჭესა“ და სოფელ გოგაშნელების „შესარიგებლად“ მოეწყო. საუბარია ახალქალაქში, სოფელ გოგაშენში მომხდარი ორგმაგი მკვლელობის შემდეგ განვითარებულ მოვლენებზე. მას შემდეგ, რაც „სამხრეთის კარიბჭეში“ სამცხე–ჯავახეთის პოლიციის დეპარტამენტის დირექტორზე თეიმურაზ კალანდაძეზე სტატია დაიბეჭდა, ჯერ ჟურნალისტზე ზეწოლა დაიწყო, შემდეგ კი რედაქციასთან სოფელ გოგაშენის მცხოვრებლებმა აქციები გამართეს. მაშინ ორგანიზაციებმა ერთსულოვნებამ’ და ‘ადამიანის უფლებათა დაცვის საყოველთაო დეკლარაციამ“ პრესკონფერენცია გამართეს და იმსჯელეს, უნდა დაეწერა თუ არა ‘სამხრეთის კარიბჭეს’ სტატია სამმართველოს უფროსზე და საერთოდ, ‘რატომ ქექავს’ თანამდებობების პირების წარსულს. ამ შეხვედრაზე ქეთევან ხმალაძე აცხადებდა, „რომ „სამხრეთის კარიბჭე“ არის მართული და ის ვინც მათ მართავს, არის ბრბო; ჟურნალისტი თამუნა უჩიძე კი არის იუდა, და მას არ რცხვენია ამ სიტყვის გამეორება, რედაქციამ „მორალში ჩააფურთხა სამცხე–ჯავახეთის საზოგადოებას“.
[თამუნა უჩიძე, ახალციხე]