ქეთევან ხმალაძე არ ამხელს უნდა მიეღო თუ არა 23 დამკვირვებელს ანაზღაურება

არასამთავრობო ორგანიზაციაში „ერთსულოვნება სამართლიანობისკენ“ „სამხრეთის კარიბჭეში“ გამოქვეყნებულ სტატიას ეხმაურებიან და ამბობენ, რომ ის ანონიმი პირები, რომლებმაც „სამხრეთის კარიბჭეს“ ანაზღაურების გადაუხდელობის შესახებ ინტერვიუ მისცეს, რეალურად მათი ორგანიზაციის წევრები არ არიან. ამის თქმის საფუძველს, ამავე ორგანიზაციის ხელმძღვანელს ქეთევან ხმალაძეს ის აძლევს, რომ ყველა მათგანს ენდობა: „23-ვეს ვენდობი თავიდან ბოლომდე და დარწმუნებული ვარ, რომ პირველად ჩემთან მოვიდოდნენ და არა „სამხრეთის კარიბჭეში“.

მისივე თქმით, ის ადამიანები, რომლებიც ვინაობას არ ამჟღავნებენ და გადაუხდელ ანაზღაურებაზე ჟურნალისტთან საუბრობენ, რეალურად შეუძლებელია, რომ „ერთსულოვნების“ წევრები იყვნენ: „ამას იმიტომ აკეთებენ, რომ ბოლო დროს ჩვენმა ორგანიზაციამ დიდი აღმოჩენები გააკეთა, ეს ჩვენს მიმართ მორიგი ანგარიშსწორებაა“.

კითხვაზე, დაპირდა თუ არა არასამთავრობო ორგანიზაცია თავის წარმომადგენლებს ერთჯერად ანაზღაურებას, ხმალაძემ გვიპასუხა: „არ ვიცი. ამ კითხვას არ გავცემ პასუხს. მოდი იფიქრონ ამაზე, უნდა მიეღოთ თუ არა ანაზღაურება, რადგან ესენი არ არსებული პიროვნებები არიან, გამომდინარე იქიდან, რომ ჩემი 23 კაციდან თქვენთან მოსული არცერთი არ არის. ეს მოგზავნილი ხალხია“.

ხმალაძეს ეთანხმება „ერთსულოვნების“ წარმომადგენელი მაია უსტიმენკო: „ამ წუთში ორგანიზაციაში იმ 23 კაციდან, ვინც არჩევნებს აკვირდებოდა, 4 ადგილზეა, არცერთი მათგანი თქვენთან არ მოსულა, ანუ გამოდის რომ 23 ადამიანი არ გამოგიკითხავთ“.

„სამხრეთის კარიბჭეს“ ინტერვიუ „ერთსულოვნების“ 23-ვე წარმომადგენელთან მართლაც არ ჩაუწერია, რადაქცია მხოლოდ 5 მათგანს ესაუბრა. თუმცა, კითხვაზე, იმ 4-მა თუ მიიღო ანაზღაურება, რომელიც ინტერვიუს ჩაწერისას „ერთსულოვნების“ ოფისში იყვნენ, უსტიმენკომ გვიპასუხა, რომ არ მიუღიათ.

შეგახსენებთ, რომ ახალციხეში მცხოვრებ 23 მოქალაქეს, რომლებიც 2013 წლის 27 ოქტომბრის საპრეზიდენტო არჩევნებს ა.ო „ახალი თაობა დემოკრატიული საქართველოსთვის“ სახელით აკვირდებოდნენ, (რადგან ამ დროისთვის „ერთსულოვნებას“ იმის გამო, რომ არასამთავრობო ორგანიზაციად ერთი წლის დარეგისტრირებული არ იყო, არ ჰქონდა უფელბა არჩევნებს დაკვირვებოდა და აღნიშნულის განხორციელება, სწორედ აღნიშნული ორგანიზაციისთან თანამშრომლობით შეძლო) დაპირებული ერთჯერადი ანაზღაურება ამ დრომდე არ მიუღია.

[თამუნა უჩიძე, ახალციხე]