9 წელი ქეთევან ხმალაძეს, 11 წელი დანარჩენებს და ერთი გამართლებული – ხმალაძის საქმე დასრულდა

ახალციხის რაიონული სასამართლოს მოსამართლემ გოჩა ჯეირანაშვილმა ნინოწმინდაში მომხდარი მკვლელობისა და ყაჩაღობის საქმეში ბრალდებულების განაჩენი ამ წუთებში გამოაცხადა.

საქმეში ექვსი ბრალდებული იყო. ამათგან ერთი, დარიკო შავაძე მოსამართლემ გაამართლა. დანარჩენი ხუთიდან კი ხუთივეს განაჩენი გამამტყუნებელია. თუმცა, ამ ხუთიდან ერთი, თემურ ბერიძე მოსამართლემ დამნაშავედ მხოლოდ ყაჩაღობაში ცნო და მას 11 წლითა და 6 თვით მიესაჯა პატიმრობა. ასევე 11 წელსა და 6 თვეს გაატარებენ საპატიმროში, ყაჩაღობაში ბრალდებული ნოდარ ართმელაძე და კობა შევარდენიძე.11 წელი მიუსაჯა მოსამართლემ ივანე გელაშვილს და 9 წელი ქეთევან ხმალაძეს, რომელსაც ბრალი ყაჩაღობაში ედებოდა.

შეგახსენებთ, რომ ნინოწმინდაში მომხდარი ყაჩაღობისა და მკვლელობის საქმეს სასამართლო 10 თვის განამვლობაში იხილავდა.

ნინოწმინდაში მომდარი ყაჩაღობისა და მკვლელობის საქმეზე 6 პირი 2016 წლის 13 იანვარს დააკავეს. მათ შორის ხუთს ჯგუფურ ყაჩაღობაში, ერთს ყაჩაღობასთან ერთად მკვლელობაში, ერთს კი დანაშაულის შეუტყობინებლობაში ადანაშაულებდნენ.

[sknews.ge]