ქეთევან ხმალაძის საქმეზე ბრალდების მხარემ დასკვნითი სიტყვა წაიკითხა

დღეს, 22 სექტემბერს ახალციხის რაიონულ სასამართლოში დასკვნით სიტყვას პროკურორი ვასილ ოსიძე საათნახევრის განმავლობაში კითხულობდა. მან მიმდინარე წლის 13 იანვარს ნინოწმინდაში მომხდარი ყაჩაღობისა და მკვლელობის საქმის დეტალები კიდევ ერთხელ გაიხსენა.

მისი თქმით, ბრალდებულებმა სოფელ ტყემლანაში, ქეთევან ხმალაძის სახლში დაგეგმეს თუ როგორ დაეყაჩაღებინათ ნინოწმინდაში ჩარენცის ქუჩაზე მცხოვრები ბაგრატ სააკიანი. ამ განხილვებს კი ერთ–ერთი ბრალდებული დარიკო შ. ესწრებოდა. მას პროკურატურა დანაშაულის შეუტყობინებლობას ედავებოდა.

ოსიძის თქმით, სააკიანს კარზე 13 იანვარს დაახლოებით 19:30 საათზე დაუკაკუნეს. კარი მისმა მეუღლემ ემა სააკიანმა გააღო. მას უთხრეს, რომ მანქანა გაუფუჭდათ და დასახმარებლად ტროსი სჭირდებოდათ: „კარი ბაგრატ სააკიანის მეუღლემ, ემა სააკიანმა გააღო. მას ხელები გადაუგრიხეს და ძირზე დააგდეს. სახლში კობა შ. თემურ ბ. და ნოდარი ა. შევიდნენ. ხმალაძე კარიდან გამობრუნდა და ივანეს მანქანაში ჩაჯდა. ემა სააკიანს კობა ზემოდან დააჯდა და თავში ბლაგვი საგანი ჩაარტყა“.

პროკურორის თქმით, ოთახში სადაც სონიკ სააკიანი [გარდაცვლილი] იყო, ნოდარი და თემური შევიდნენ: „ნივთების განლაგებიდან ირკვევა, რომ სააკიანს ცემის შედეგად გასძვრა ფეხზე რაც ეცვა, ასევე მოძვრა თავშალი, პირიდან პროტეზი. მას შვიდი ჭრილობა ჰქონდა, აქედან ერთი საძილე არტერიის. სწორედ ამიტომ დაიცალა სისხლისგან“.

სონიკ სააკიანი რომ თემურმა მოკლა, პროკურორის თქმით, ეს არა ერთი მტკიცებულებით ირკვევა: „სახლიდან გამოსული თემური, როცა მანქანაში დაჯდა, ამბობდა ვერ გავაჩერე ეს ქალი და მოვკალიო“.

პროკურორმა ბრალდებულებზე პოლიციის თანამშრომლების მხრიდან შესაძლო ძალადობის შესახებაც ისაუბრა: „ჰქონდა თუ არა ძალადობას ადგილი, ან მოიპოვეს თუ არა მტკიცებულებები ამ ძალადობის განხორციელებით, ამაზე შეეძლოთ ბრალდებულებს, რომ სასამართლოში ესაუბრათ. ბევრი კითხვა გვქონდა, მაგრამ ჩვენების მიცემა არ ისურვეს“.

პროკურორმა ქეთევან ხმალაძის, ნოდარ ა–ს, კობა შ–სა და ივანე გ–სთვის ყაჩაღობაზე, თემურ ბ–სთვის ყაჩაღობასა და მკვლელობაზე, დარიკო შ–სთვის კი დანაშაულის შეუტყობინებლობაზე ითხოვა სასჯელის შეფარდება.

27 სექტემბერს დასკვნით სიტყვებს ადვოკატები წაიკითხავენ. ამის შემდეგ საბოლოო სიტყვებს ბრალდებულები წარმოთქვამენ და მოსამართლე გადაწყვეტილებას გამოაცხადებს.

შეგახსენებთ, რომ მიმდინარე წლის 13 იანვარს ნინოწმინდაში მომდარი ყაჩაღობისა და მკვლელობის საქმეზე 6 პირი 2016 წლის 16 იანვარს დააკავეს. მათ შორის ხუთს ჯგუფურ ყაჩაღობაში, ერთს ყაჩაღობასთან ერთად მკვლელობაში, ერთს კი დანაშაულის შეუტყობინებლობაში ადანაშაულებენ.

[თამუნა უჩიძე, ახალციხე]