ახალციხის პირველი საჯარო სკოლის ეზოს რეაბილიტაცია მიმდინარეობს

პირველ საჯარო სკოლაში სამუშაოები დაახლოებით ერთი კვირის წინ დაიწყო და ოქტომბერში დასრულდება.

როგორც სკოლის დირექტორი ჟუჟუნა გოგოლაური განმარტავს, სარეაბლიტაციო სამუშაოები სასწავლო პროცესის დაწყებას ხელს არ შეუშლის.

სატენდერო დოკუმენტების მიხედვით, სამუშაოებს ტენდერში გამარჯვებულმა კომპანია ს.ს „ერისიმედი“ ასრულებს. სკოლის ეზოში ასფალტი 1940 კვ. მეტრზე დაიგება. რკინის ღობე კი აგურის ღობით ჩანაცვლდება. გაკეთდება სანიაღვრე არხები და საკანალიზაციო ჭა.

პროექტით ასევე გათვალისწინებულია ეზოში ხელოვნურსაფარიანი კომბინირებული მინიფეხბურთის, კალათბურთისა და ფრენბურთის სპორტული მოედნის მშენებლობა.

შეგახსენებთ, რომ ეს პირველი საჯარო სკოლის რეაბილიტაციის მეორე ეტაპია. პირველ ეტაპზე შენობას სრული რეაბლიტაცია ჩაუტარდა და აღიჭურვა თანამედროვე ლაბორატორიებით.

სარეაბილიტაციო სამუშაოებს განათლებისა და მეცნიერების სამინისტროს, საგანმანათლებლო და სამეცნიერო ინფრასტრუქტურის განვითარების სააგენტო აშშ-ის ათასწლეულის გამოწვევის კორპორაციის (“Millennium Challenge Corporation- MCC”) დაფინანსებით ახორციელებს.



[თორნიკე ზაზაძე, ახალციხე]