‘სიმბოლურად დაამთხვიეს, ახალ წელს ახალი თავმჯდომარე აირჩიეს’ – ლომიძე მოვალეობის შესრულებას შეუდგა

საკრებულოს ახალარჩეული თავმჯდომარე დავით ლომიძე. ფოტო: 'სამხრეთის კარიბჭე'[28.12.2015]

რატომ მოანდომა ხუთი თვე იმაზე ფიქრს უმრავლეობამ, თუ ვინ უნდა დაეყენებინათ საკრებულოს თავმჯდომარედ, დეპუტატები არ საუბრობენ.
„არ ვიცი აქამდე რატომ არ აირჩიეს“, – ამბობს საკრებულოს ყოფილი თავმჯდომარე კახა ბერიძე.

„სიმბოლურად დაამთხვიეს, ახალ წელს ახალი თავმჯდომარე აირჩიეს“, – ამბობს საკრებულოს თავმჯდომარეობის კანდიდატი „ნაციონალური მოძრაობიდან“ ზურაბ სადათიერაშვილი და ახარჩეულ თავმჯდომარეს წარმატებებს უსურვებს.

თავად ლომიძე აცხადებს, რომ მას უმრავლესობამ თავმჯდომარეობა ორი დღის წინ შესთავაზა: „მადლობა კოლეგებს ნდობისთვის. აუცილებელია, რომ საკრებულოს უფრო მჭიდრო ურთიერთობა ჰქონდეს მოსახლეობასთან“.

საკრებულოს თავმჯდომარის არჩევნები. ფოტო: 'სამხრეთის კარიბჭე'[28.12.2015]

საკრებულოს თავმჯდომარის მოადგილე თამარ გოგოლაძე ლომიძეს წარმატებებს უსურვებს. კითხვაზე, აქამდე რატომ არ დადგა საკრებულოს თავმჯდომარის არჩევა დღის წესრიგში, გვპასუხობს: „ადამიანმა თავად უნდა მოისურვოს თავმჯდომარეობა და მხარდამჭერებიც უნდა მოიპოვოს, რომ შემოიტანოს განცხადება“.

შეგახსენებთ, დღეს, 28 დეკემბერს ახალციხის საკრებულომ თავმჯდომარედ დავით ლომიძე აირჩია. კანდიდატურა დააყენა უმცირესობის წარმომადგენელმა ზურაბ სადათიერაშვილმაც, თუმცა 9 ხმით 5–ის წინააღმდეგ სადათიერაშვილს არჩევნები ლომიძემ მოუგო. ერთი ბიულეტები ბათილად ჩაითვალა, მასში შემოხაზული არცერთი კანდიდატი არ იყო.

საკრებულოს თავმჯდომარის არჩევნები. ფოტო: 'სამხრეთის კარიბჭე'[28.12.2015]

[თამუნა უჩიძე, ახალციხე]