'კოხტა გორაზე' განახლებული საბაგიროს გახსნას პრემიერობის კანდიდატი დაესწრო [Photo]

გიორგი კვირიკაშვილთან ერთად, კოხტის გახსნის ოფიციალურ ცერემონიალში მონაწილეობა მიიღეს საქართველოს ეკონომიკისა და მდგრადი განვითარების მინისტრის მოვალეობის შემსრულებელმა დიმიტრი ქუმსიშვილმა, განათლებისა და მეცნიერების მინისტრის მოვალეობის შემსრულებელმა თამარ სანიკიძემ, სპორტისა და ახალგაზრდობის საქმეთა მინისტრის მოვალეობის შემსრულებელმა ტარიელ ხეჩიკაშვილმა, აგრეთვე სხვა სამთავრობო და ბიზნეს-სტრუქტურების ხელმძღვანელმა პირებმა

განახლებული საბაგიროს გახსნის ცერემონიალს ასევე დაესწრნენ სამცხე–ჯავახეთის გუბერნატორი აკაკი მაჭუტაძე და ბორჯომის ადგილობიივი თვითმმართველობის წარმომადგენლები.

ბორჯომის მუნიციპალიტეტის გამგეობის ინფორმაციით, განახლებული სათხილამურო ტრასა თანამედროვე სტანდარტების შესაბამისად აღიჭურვა. სამ კილომეტრზე მეტი სიგრძის ტრასაზე პირველი დაშვება უკვე შედგა.

როგორც გამგეობაში განმარტავენ, აღნიშნულ პროექტის გასახორციელებლად თანამშრომლობის მემორანდუმი გაფორმდა - საქართველოს მთავრობას, საქართველოს ეკონომიკისა და მდგრადი განვითარების სამინისტროს სსიპ "სახელმწიფო ქონების ეროვნულ სააგენტოს", ასევე ეკონომიკის სამინისტროს შპს "მთის კურორტების განვითარების კომპანიას" და "თიბისი ჯგუფის" კომპანია "ჯიარდისი ჰოლდინგს" შორის. კოხტას მთაზე დამონტაჟდა მსოფლიოში ერთ-ერთ წამყვანი მწარმოებლის "დოპელმაიერის" საბაგირო.

"აღსანიშნავია, რომ დაბა მიტარბის ტერიტორიაზე 2016 წლის ბოლოს დასრულდება ორი საბაგიროსა და ერთი საჩოჩიალოს, მშენებლობა. მიმდებარე ტერიტორიაზე აშენდება 300 საწოლზე გათვლილი ტურისტული ინფრასტრუქტურა- სასტუმროები, აპარტოტელები, კოტეჯები, კვებისა და გასართობი ობიექტები, რაც ხელს შეუწყობს სამთო-სათხილამურო ტურიზმის განვითარებას საქართველოს ისტორიულ კურორტ ბაკურიანში", – აცხადებენ ბორჯომის მუნიციპალიტეტის გამგეობაში.









[ნინო ნარიმანიშვილი, ბორჯომი]