ბაკურიანში სამი ახალი საბაგირო აშენდება

ეკონომიკისა და მდგრადი განვითარების სამინისტროს ინფორმაციით, საბაგიროების საერთო სიგრძე ხუთი კილომეტრი იქნება.

შესაბამის ხელშეკრულებას ხელი დღეს მოეწერა. „ხელი ეწერება უმნიშვნელოვანეს კონტრაქტს, რომლის მიხედვითაც ამ ულამაზეს ადგილზე ჩვენ ავაშენებთ სამ ახალ საბაგიროს“, - ამის შესახებ საქართველოს პრემიერ-მინისტრმა მამუკა ბახტაძემ ბაკურიანში განაცხადა, სადაც „დოპელმაიერ-გარავენტა ჯგუფთან“ სამი ახალი საბაგიროს მშენებლობის დაწყებასთან დაკავშირებით ხელშეკრულება გაფორმდა.

ახალ საბაგიროებს, თხილამურითა და სნოუბორდით თავისუფალი სტილით სრიალში 2023 წლის მსოფლიო ჩემპიონატისთვის გამოიყენებენ, რომელიც ბაკურიანში ჩატარდება.

მთავრობის მეთაურის განცხადებით, მნიშვნელოვანია, რომ საქართველოს ოლიმპიურმა კომიტეტმა გააკეთა შესაბამისი განაცხადი და საქართველოს აქვს ამბიცია, უმასპინძლოს 2025 წელს ახალგაზრდულ ოლიმპიადას ზამთრის სახეობებში.

მშენებლობას ავსტრიულ-შვეიცარიული კომპანია „დოპელმაიერ-გარავენტა ჯგუფთან“ განახორციელებს. ხელშეკრულება საქართველოს ეკონომიკისა და მდგრადი განვითარების სამინისტროს „მთის კურორტების განვითარების კომპანიამ“ გააფორმა.

[ავთო ინასარიძე, ბორჯომი]