წყლის ხარისხის შესახებ ინფორმაცია საჯაროდ გამოიკვრება

ახალციხეში წყლის ხარისხის შესახებ ინფორმაციას მოსახლეობა საქართველოს გაერთიანებული წყალმომარაგების კომპანიის სამცხე–ჯავახეთის ფილიალისა და ახალციხის სერვისცენტრში განთავსებულ დაფებზე გამოქვეყნებული ლაბორატორიული კვლევის შედეგებით მიიღებს.

კომპანიამ აღნიშნული გადაწყვეტილება მას შემდეგ მიიღო, რაც „დემოკრატ მესხთა კავშირის“ ინიციატივით ახალციხის მომხმარებელთა დახმარების ცენტრმა ახალციხის ოთხ ქუჩაზე წყლის ხარისხი შეამოწმა და ოთხი ქუჩიდან ორზე დარღვევები დააფიქსირა. ამის შემდეგ არასამთავრობო ორგანიზაცია წყლის ხარისხის შესახებ ინფორმაციის გასაჯაროვებას ითხოვდა.

თუმცა, წყალმომარაგების კომპანიას „დემოკრატ მესხთა კავშირის“ მიმართვა არ გაუთვალისწინებია. შემდეგ კი ორგანიზაციამ აღნიშნულის შესახებ საქართველოს ენერგეტიკისა და წყალმომარაგების მარეგულირებელ ეროვნულ კომისიასთან დამოუკიდებლად არსებულ მომხმარებელთა ინტერესების საზოგადოებრივ დამცველს აცნობა, რომელმაც საქართველოს გაერთიანებული წყალმომარაგების კომპანიას სარეკომენდაციო ხასიათის წერილი გაუგზავნა.

წყლის ხარისხი ახალციხეში "დემოკრატ მესხთა კავშირმა" პროექტის "ნდობის მშენებლობა სამხრეთ კავკასიაში" ფარგლებში შეამოწმა. აღნიშნულ პროექტს საქართველოს გაეროს ასოციაცია, შვედეთის გაეროს ასოციაციის ფინანსური მხარდაჭერით ახორციელებს.

[თამარ თოთაძე, ახალციხე]