ქალაქის მერი ‘ახალციხის ციხის’ ამბებზე: ძალიან ნუ გაზრდით ამ თემას

გიორგი კოპაძის განცხადებით, ადამიანებს შორის შელაპარაკება ყოველთვის ხდება და ამ თემის მსჯელობის საგნად ქცევა საჭირო არ არის.

„მე არ ვიცი ამ ფაქტის შესახებ ჯერ არაფერი. როგორც გავიგე, სიტყვიერი შელაპარაკება მოხდა. ეს ყველა ადამიანს შორის შეიძლება მოხდეს. ფიზიკური დაპირისპირების შესახებ არაფერი ვიცი, შეიძლება მოხდა კიდეც, მაგრამ არამგონია. ნუ გააკეთებთ ამის აჟიტირებას და ძალიან ნუ გაზრდით ამ თემას“, – განაცხადა ახალცხის მერმა დღეს, 24 დეკემბერს ჟურნალისტებთან შეხვედრისას.

„ახალციხის ციხეში“ მომხდარი დაპირისპირების თემაზე მერს დეტალები აღარ განუხილავს, მან განაცხადა, რომ დაწყებულია გამოძიბა და დაელოდება შედეგებს.

შეგახსენებთ, რომ „ახალციხის ციხის“ თანამშრომლების თქმით, „ახალციხის ციხის“ დირექტორის მოვალეობის შემსრულებელს ილია სიდამონიძეს მისი მოადგილის, ნათია ხუციშვილის მეღულემ, ახალციხის მერიის ყოფილმა თანამშრომელმა, გიგი რუხაძემ ფიზიკური და სიტყვიერი შეურაცხყოფა მიაყენა.

„სამხრეთის კარიბჭეში“ გამოქვეყნებული სტატიის საფუძველზე კი შსს–მ გამოძიება დაიწყო. საქმეს სისხლის სამართლის კოდექსის 125–ე მუხლით იძიებენ, რაც ცემას გულისხმობს.

[ვარლამ წიკლაური, ახალციხე]