რესტორან ‘ემიგრანტთან’ მომხდარი დაპირისპირების შედეგად 2 პირი დააკავეს

ფოტო:რესტორანი „ემიგრანტი“

დაპირისპირება „ემიგრანტის“ სტუმრებს შორის, გუშინ 24 ივლისს მოხდა. ამ დროს რესტორანში ორი სხვადასხვა სუფრა იყო გაშლილი, ნათლობის და დაბადების დღის. როგორც ადგილობრივები ამბობენ, სიტყვიერი შელაპარაკება ორი მაგიდის სტუმრებს შორის დაიწყო და შემდეგ ფიზიკურ დაპირსპირებაში გადაიზარდა. პოლიცია რესტორნის თანამშრომლებმა გამოიძახეს.

შინაგან საქმეთა სამინისტრომ ორი პირი ადმინისტრაციულ სამართალდარღვევათა კოდექსის 173-ე მუხლით დააკავა, რაც სამართალდამცავების მოთხოვნის დაუმორჩილებლობას გულისხმობს. მათი სასამართლო პროცესი ახალციხის სასამართლოში დღეს, 25 ივლისს გაიმართა, მოსამართლე ანაიტ ოგანესიანმა, ორივე მათგანს ორდღიანი პატიმრობა შეეფარდა.

გარდა აღნიშულისა, რესტორანთან მომხდარ დაპირისპირებასთან დაკავშირებით, შინაგან საქმეთა სამინისტრომ გამოძიება სისხლის სამართლის კოდექსის 126–ე მუხლით დაიწყო, რაც ჯგუფურ ძალადობას გულისხმობს.

„მიმდინარეობს ინტენსიური საგამოძიებო მოქმედებები, საქმეში ჩართული ყველა პირის იდენტიფიცირება–დადგენის მიზნით“,– აცხადებენ შსს–ში.

რატომ დაიწყო დაპირისპირება სტუმრებს შორის, რესტორანში არ გვეუბნებიან: „პოლიცია ჩვენ გამოვიძახეთ, სხვას ვერაფერს გეტყვით, ჩხუბი რესტორნის ტერიტორიაზე არ მომხდარა“.

ადგილობრივები ამბობენ, რომ დაპირისპირებაში 100–ზე მეტი ადამიანი მონაწილეობდა, თუმცა სამედიცინო დახმარება არცერთ მათგანს არ დაჭირვებია: „რესტორნის ეზოს მიმდებარედ ჩხუბობდნენ, პოლიცია მათ გაშველებას ნახევარი საათი ცდილობდა".

[sknews.ge]