რას ფიქრობენ სამცხე – ჯავახეთის ხელისუფლებაში პრემიერის გადადგომაზე

დღეს, 23 დეკემბერს, 20:00 საათზე, საქართველოს უკვე ყოფილმა პრემიერ – მინისტრმა ირაკლი ღარიბაშვილმა გადადგომის შესახებ განაცხადა. მისი ბრიფინგი პირდაპირ ეთერში გადაიცემოდა.

„მას მერე, რაც ბატონმა პრემიერმინისტრმა გადადგა, მე ვიტყოდი, უპრეცედენტო ნაბიჯი და მისი პოპულარობისა და პოლიტიკური გავლენის ზენიტში მყოფმა, მისივე გადაწყვეტილებით, დატოვა თანამდებობა, მან შექმნა მაგალითი იმისა, თუ როგორ უნდა აკეთოს პოლიტიკოსმა ქვეყნისთვის სასარგებლო საქმე, როგორც დროული მოსვლით, ისე თანამდებობიდან დროული წასვლით“, – განაცხადა ირაკლი ღარიბაშვილმა, აქვე ისაუბრა იმ მიღწევებზე, რაც საქართველოს აქვს 2012 წლიდან დღემდე, მადლობა გადაუხადა კოლეგებსა და ოჯახის წევრებს თანადგომისთვის და დასძინა, რომ პრემიერის პოსტს ტოვებს, – „თანამდებობები არის დროებითი, მარადიული არის უფალი და სამშობოლო!“

ბრიფინგის დამთავრებისთანავე „სამხრეთის კარიბჭე“ რეგიონის მუნიციპალიტეტების ხელმძღვანელებს დაუკავშირდა. უმეტესობამ მომხდარზე საუბარი არ ისურვა, ამათგან ნაწილმა იმ მოტივით, რომ განცხადება არ მოუსმენიათ, ეს კი მაშინ, როცა პრემიერის მოსალოდნელ გადადგომაზე მედია დილიდან წერდა.

„არ ვარ საქმის კურსში, არ მიყურებია საინფორმაციოსთვის. ხომ უნდა მოვისმინო რატო გააკეთა ეს განცხადება?! თქვენგან მოსმენილით როგორ შევაფასოო?“– გვითხრა ასპინძის მუნიციპალიტეტის გამგებელმა ლევან ცაბაძემ.

„ვერაფერს გეტყვით რა“, – განაცხადა ადიგენის მუნიციპალიტეტის გამგებელმა ზაქარია ენდელაძემ.

ახალციხის მუნიციპალიტეტის გამგეობის საზოგადოებასთან ურთიერთობის სამსახურში გვითხრეს, რომ გამგებელს ამ თემაზე საუბარი არ სურს.

ახალქალაქის მუნიციპალიტეტის გამგებელმა ედუარდ აღასარიანმა როგორც კი „სამხრეთის კარიბჭე“ გაიგო, განაცხადა, რომ ჩვენი ხმა არ ესმოდა და ტელეფონი გათიშა, შემდეგ კი ჩვენს ზარებს საერთოდ აღარ უპასუხა.

ბორჯომის მუნიციპალიტეტის გამგებელმა დიმიტრი ყიფიანმა გვითხრა, რომ ამ თემაზე საუბარი მისი კომპეტენცია არ არის.

ნინოწმინდის მუნიციპალიტეტის გამგებელმა კი მოუცლელობა დაასახელა და მომხდარის კომენტირებისთვის ხვალ დაკავშირება გვთხოვა.

განსხვავებით გამგებლებისგან, „სამხრეთის კარიბჭე“ ვერ დაუკავშირდა ქალაქ ახალციხის მერს გიორგი კოპაძეს. მერიის საზოგადოებასთან ურთიერთობის სამსახურში გვითხრეს, რომ მერი შეხვედრაზეა და თავად დაუკავშირდებიან, შემდგ კი მოკლეტექსტური შეტყობინება მოგვეწერეს, რომ მერი ტელეფონს არ პასუხობს.

„სამხრეთის კარიბჭემ“ თავად დაურეკა სამცხე–ჯავახეთის გუბერნატორს, აკაკი მაჭუტაძეს, თუმცა, მან ჩვენს სატელეფონო ზარებს არ უპასუხა.

[ვარლამ წიკლაური, ნინო ნარიმანიშვილი, ახალციხე]