რა უნდა იყოს სკოლიდან გარიცხვის ალტერნატივა

საქართველოს განათლებისა და მეცნიერების სამინისტრო სკოლებს, მოსწავლეებს, მშობლებს, ფსიქოლოგებსა თუ ექსპერტებს მოუწოდებს იმ მექანიზმებზე იფიქრონ, რომლის დახმარებითაც მოსწავლეთა პრობლემები სკოლებშივე მოგვარდება და თავიდან ავიცილებთ მათ გარიცხვას.

ინიციატივა განათლების მინისტრმა 12 ნოემბერს გაახმოვანა. რეკომენდაციების წარსადგენად დაინტერესებულ ადმიანებს ორი კვირის ვადა აქვთ.

ფიქრი - რა შეიძლება გახდეს გარიცხვის ალტერნატივა, სკოლებში უკვე დაიწყეს. ახალციხის პირველი საჯარო სკოლის დორექტორი მაკა ჯანაშვილი ამბობს, რომ ყველა რთული ბავშვის უკან ძალიან დიდი პრობლემა დგას, ამიტომ, გარიცხვა გამოსავალი არ არის: ”შეიძლება იყოს ოჯახური ან სოციალური პრობლემა. ვცდილობთ გამოვიკვლიოთ რატომ არის მოსწავლე ასეთი აგრესიული და შეძლებისდაგვარად დავეხმაროთ”.

სამინისტროც და პედაგოგთა ნაწილიც მიიჩნევს, რომ რადგან ხშირად დისციპლინის პრობლემა ფსიქოლოგიურ ფაქტორებზეა დამოკიდებული, ერთ-ერთი ალტერნატივა შესაძლოა ფსიქოლოგიური სამსახურების ფორმირება გახდეს.

”ბავშვები, რმლებსაც სწავლის მიმართ ინტერესი არ აქვთ, გაკვეთილზე მოუსვენრად არიან და თანაკლასეკლებსაც ყურადღებას აკარგვინებენ. მქონდა ასეთი შემთხვევა მერვე კლასში, ყველა ხერხი ვცადე, რომ დამეინტერესებინა გაკვეთილით, მაგრამ შედეგს ვერ მივაღწიე. ვფიქრობ, ამ შემთხვევაშიფსიქოლოგის კონსულტაციაა საჭიროა”,-ამბობს ქართული ენისა და ლიტერატურის მასწავლებელი მანონი ყავრელიშვილი.

ფსიქოლოგიური სამსახურის აუცილებლობაზე საუბრობს ფსიქოლოგი გულიკო ბექაურიც. მისი თქმით, თანამედროვე განათლების რეფორმა და ზოგადად, დღევენდელი ცხოვრება, ფსიქოლოგის ინსტიტუტის გაძლიერებას ითხოვს: ”როდესაც ვსაუბრობთ ფსიქოლოგის როლზე, ვსაუბრობთ პიროვნებაზე, რომელსაც შეუძლია პედაგოგს დაეხმაროს ბავშვებთნ ინდივიდუალურ მიდგომაში; იმ პრობლემების გამოვლენაში, რომელიც შეიძლება წარმოიშვას სწავლების პროცესში”.

მისი აზრით, არასრულწლოვანთა დანაშაულების წინასწარი პრევენციის თვალსაზრისით ფსიქოლოგი აქტუირად უნდა იყოს ჩართული სკოლის ცხოვრებაში. სკოლიდან გარიცხვა გამოსავალი არ არის, მსგავსი საქციელი მოსწავლეს უფრო უბიძგებს დანაშაულის ჩადენისკენ.

[თინათინ ზაზაძე, ახალციხე]