ახალგაზრდულმა კლუბებმა ტოლერანტობის დღე აღნიშნეს

ღონისძიება არასამთავრობო ორგანიზაცია ”დემოკრატ მესხთა კავშირის” ორგანიზებით, ახალგაზრდული პროგრამების ფარგლებში, ტოლერანტობის საერთაშორისო დღესთან დაკავშირებით გაიმართა. მასში ახალციხისა და ზუგდიდის ახალგაზრდული კლუბის წევრები მონაწილეობდნენ.

ახალგაზრდებმა საკუთარი ისტორიების, ტრადიციებისა და კულტურის შესახებ ისაუბრეს. ასევე, მათ საშუალება ჰქონდათ ”სამოქალაქო ინტეგრაციის ფონდის” ხელმძღვანელთან, ზაურ ხალილოვთან ტოლერანტობის თემაზე ონლაინ რეჟიმში დაესვათ კითხვები.

”მნიშვნელოვანია, რომ ეს დღე აღინიშნება. ეთნიკური უმცირესობის მიუღებლობა ერთ-ერთი პრობლემაა ჩვენს საზოგადოებაში. რაც უფრო ხშირად იქნება მსგავსი ღონისძიებები, მით მალე მოგვარდება ეს პრობლემა. ვცდილობთ, რომ ეს ურთიერთობები უფრო დავაბალანსოთ. დღევანდელი დღეც ერთ-ერთი ასეთი გამოვლინება იყო”, - ამბობს სტუდენტი ნინო ავეტისიანი.

”დემოკრატ მესხთა კავშირის” ხელმძრვანელის გიორგი ანდღულაძის თქმით, ტოლერანტობის დღე გაეროს წევრ თითქმის ყველა ქვეყანაში აღინიშნება:
”ჩვენ გადავწყვიტეთ, რომ ტოლერანტობის დღესთან დაკავშირებით, განსხვავებული დღე მოგვეწყო. შევეცადეთ, სხვადასხვა ეთნიკური წარმოშობის ახალგაზრდებს ერთმანეთისთვის მიეწოდებინათ ინფორმაცია საკუთარი ისტორიის, საკუთარი ტრადიციების და კულტურის შესახებ”.

”ინვალიდ ქალთა და ინვალიდ ბავშვთა დედათა ასოციაცია დეას” საზოგადოებასთან ურთიერთობის ხელმძღვანელის ნონა ქობალიას თქმით, ქვეყნის განვითარებისთვის მნიშვნელოვანია ის, რომ ეთნიკური უმცირესობების წარმომადგენლები თავს კარგად გრძნობდნენ და მათი თვითმყოფადობა, რწმენა და შეხედულებები შენარჩუნებული იყოს.

”დღეს ძალიან მნიშვნელოვანი დღეა, რადგან საქართველოში მრავალი ეთნიკური წარმოშობის ადამიანი ცხოვრობს. არ უნდა იყოს განსხვავება ეთნიკური უმცირესობის წარმომადგენლებსა და მოსახლეობის უმრავლესობას შორის. ჩვენ არცერთი შეცდომა აღარ გვეპატიება. აუცილებელია, რომ ამაზე პირველ რიგში ახალგაზრდობამ ისაუბროს, რადგან ისინი ახალი დროის ადამიანები არიან და ის შეცდომები, რაც უფროს თაობას დაგვიშვია, ახალგაზრდობამ აღარ უნდა დაუშვას”, - ამბობს იგი.

[თამარ თოთაძე, ახალციხე]