ტოლერანტობის ცენტრმა ვებ-გვერდის პრეზენტაცია გამართა

შეხვედრა ორგანიზაცია ”დემოკრატ მესხთა კავშირის” საკონფერენციო დარბაზში შედგა და მას ახალციხელი ახალგაზრდები ესწრებოდნენ.

- ”საიტი არის ძალიან საინტერესო მათთვის, ვინც დაინტერსებულია ეთნიკური და რელიგიური მრავალფეროვნებით, სიტყვის თავისუფლების საკითხით, უმცირესობების უფლებების თემებით და ასევე ტოლერანტობის კულტურის განვითარებით”, - აღნიშნავს ტოლერანტობის ცენტრის წარმომადგენელი ბექა მინდიაშვილი.

ვებ-გვერდის მიზანია საქართველოში ტოლერანტობის კულტურის საინფორმაციო, შემეცნებით–საგანმანათლებლო და სამართლებრივი მხარდაჭერა; საიტზე, რომელიც გაეროს განვითარების პროგრამის მხარდაჭერით შეიქმნა, წარმოდგენილია როგორც რელიგიურ და ეთნიკურ უმცირესობებთან, ასევე რასობრივ საკითხებთან დაკავშირებული ინფორმაცია. უმცირესობათა დღესასწაულების ამსახველი ფოტო, აუდიო, ვიდეო და ტექსტური მასალები.

გარდა ამისა, ვებ-გვერდზე ატვირთულია ტოლერანტობის ცენტრის მიერ მომზადებულ პუბლიკაციები: ენციკლოპედიები "რელიგიები საქართველოში" და "ეთნოსები საქართველოში"; და ასევე ჟურნალ "სოლიდარობის" ყველა ნომერი.

ჟურნალს ”სოლიდარობა”, ტოლერანტობის ცენტრი 2006 წლიდან გამოსცემდა. 2010 წელს, ფინანსური პრობლემების გამო, ჟურნალმა არსებობა შეწყვიტა. ოთხი წლის განმავლობაში ”სოლიდარობის” 39 ნომერი გამოვიდა.

ტოლერანტობის ცენტრის წარმომადგენლის ბექა მინდიაშვილი თქმით, ბოლო პერიოდში ჟურნალი მხოლოდ 1500 ტირაჟით გამოდიოდა: ”რადგან ფინანსური პრობლემების წინაშე დავდეგით და მეორე მხრივ, ჩავთვალეთ, რომ ვებ-გვერდის საშუალებითაც შევძლებდით მკითხველის ყურადღების მიპყრობას, ამიტომ გადავწყვიტეთ ვებ-გვერდის მეშვეობით გავაშუქოთ ეთნიკური და რელიგიური უმცირესობების საკითხები და ის თემები, რომელიც შედის ტოლერანტობის ცენტრის ინტერესში”.

ტოლერანტობის ცენტრის წარმომადგენლები ახალციხეში ორ დღეს დარჩებიან. ხვალ ისინი სომხური სამოციქულო ეკლესიის და საყოველთაო სომხური დღესასწაულის ვართავარის შესახებ მოკლემეტრაჟიან ფილმს გადაიღებენ.

შეგახსენებთ, რომ სომხური სამოციქულო ეკლესია ხვალ ვართავარს, ანუ, ფერისცვალების დღესასწაულს აღნიშნავს. 15 ივლისი ეთნიკური სომხებისთვის ამავდროულად სახალხო დღესასწაულია, ამ დღეს მათ სახალხო წუწაობის ტრადიცია აქვთ.

[ნინო ნარიმანიშვილი, ახალციხე]