‘არ გვინდოდა მონაწილეობა შოუში და ცირკში’ – უმცირესობამ ბიუჯეტს მხარი არ დაუჭირა

17 დეკემბერი, საკრებულოს N18 სხდომა, რომელზედ 2016 წლის ბიუჯეტი დამტკიცდა.

დღეს, 17 დეკემბერს, ახალციხის მუნიციპალიტეტის საკრებულოს N18 სხდომაზე, საკრებულომ 2016 წლის მთავარი ფინანსური დოკუმენტი დაამტკიცა. ბიუჯეტი 4.452.000 ლარით განისაზღვრა.

სხდომას 26 დეპუტატი ესწრებოდა, ბიუჯეტს „ერთიანი ნაციონალური მოძრაობის“ დეპუტატებმა მხარი არ დაუჭირეს. უმცირესობის წარმომადგენლებს ბიუჯეტის განხილვისას არც წერილობითი შენიშვნები შეუტანიათ.

„ჩვენ არ გვინდოდა მიგვეღო მონაწილეობა შოუში და ცირკში, ძალიან კარგად ვიცით რაში უნდა დავხარჯოთ ჩვენი ძვირფასი დრო“, – ამბობს ახალციხის მუნიციპალიტეტის საკრებულოს დეპუტატი, „ერთიანი ნაციონალური მოძრაობის“ წევრი მაკა სუდაძე.

„ნაცმოძრაობის“ წევრების არგუმენტით, ბიუჯეტი გაუმართავი დოკუმენტია და არ აპირებენ, მოსახლეობის წინაშე პასუხისმგებლობა აიღონ: „4–მილიონიანი ბიუჯეტის ფონზე, ორი მილიონი ხელფასებსა და ხარჯებზეა გათვლილი“.

საწინააღმდეგოს ამტკიცებს ახალციხის მუნიციპალიტეტის გამგებელი ზაზა მელიქიძე. მისი თქმით, ბიუჯეტის ძირითადი პრიორიტეტები თემში ინფრასტრუქტურისა და სასმელი წყლის სათავე ნაგებობის მოწყობაზე, ასევე, სკოლამდელი აღზრდის განვითარებასა და სოციალურ პაკეტზეა გათვლილი.

„ძალიან ბევრი რამ კეთდება მუნიციპალიტეტში. მიმდინარე წელს 100 პროექტზე მეტი განვახორციელეთ. შემუშავებული გვაქვს სამწლიანი გეგმა, თითოეულ სოფელში რა უნდა გაკეთდეს. არ ვიცი რატომ ამბობენ ამას „ნაციონალური მოძრაობის“ დეპუტატები, ეტყობა სხვა სათქმელი აღარ აქვთ“, – ამბობს მუნიციპალიტეტის გამგებელი ზაზა მელიქიძე.

ახალციხის მუნიციალიტეტის გამგეობის საფინანსო–საბიუჯეტო სამსახურის უფროსი გელა ლომიძე ამბობს, რომ ბიუჯეტის წინა განხილვის შემდეგ თითქმის არაფერი შეცვლილა, გარდა მიზნობრივი ტრანსფერისა: „11 ათასი ლარით გაიზარდა მიზნობრივი ტრანსფერის ოდენობა დელეგირებული უფლებამოსილების განსახორციელებლად. აღნიშნული თანხა დაემატა ააიპ „ჯანდაცვის სოციალურ სამსახურს“.

მისი თქმით, საკრებულომ გამგეობას ბიუჯეტის პროექტის შენიშვნების გარეშე დაუბრუნა.

დღევანდელ საკრებულოს სხდომაზე დეპუტატებმა 12 საკითხი განიხილეს. მუნიციპალიტეტის საკრებულოში აცხადებენ, რომ შესაძლოა ეს 2015 წელს საკრებულოს ბოლო სხდომა იყო.



[თინათინ ზაზაძე, ახალციხე]