2015 წლის ბიუჯეტს არასამთავრობოები ეცნობიან

ახალციხის მუნიციპალიტეტის 2015 წლის ბიუჯეტის პროექტი საჯაროდ განიხილეს. შეხვედრას სტუდენტები, არასამთავრობო ორგანიზაციების წარმომდგენლები და ახალციხის მუნიციპალიტეტის გამგეობისა და საკრებულოს წევრები ესწრებოდნენ.

ახალციხის მუნიციპალიტეტის ადგილობრივი ბიუჯეტი 3 მილიონ 840 ათასი ლარით განისაზღვრა.

ადგილობრივ თვითმმართველობაში განმარტავენ, რომ მომავალი წლის ბიუჯეტში ერთ–ერთი პრიორიტეტი მელიორაცია იქნება. აღნიშნულისთვის ბიუჯეტში 79 ათას ლარზე მეტია გათვალისწინებული. როგორც ახალციხის მუნიციპალიტეტის გამგებელმა ზაზა მელიქიძემ აღნიშნა, მომავალ წელს მუნიციპალიტეტში მინიმუმ ორი სატუმბი სადგურის აღდგენა იგეგმება. გარდა ამისა, ყურადღება მიექცევა ინფრასტრუქტურას.

„მოწესრიგდება სარწყავი წყლის სისტემა, ასევე სასმელი წყლის სათავე ნაგებობები და მაგისტრალები, შიდა ქსელი. ასევე დაგეგმილია ინფრასტურქტურული პროექტები და მოწესრიგდება სხვადასხვა სოფლისკენ მიმავალი გზები“, – ამბობს ახალციხის მუნიციპალიტეტის გამგებელი ზაზა მელიქიძე.

ინფრასტრუქტურის მშენებლობა, რეაბილიტაცია და ექსპლოატაციისთვის ადგილობრივ ბიუჯეტში 861,9 ათასი ლარია გათვალისწინებული. ააიპ სკოლამდელი აღზრდის დაწესებულებების სუბსიდირებისთვის 620,8 ათასი ლარი, ხოლო შეშით უზრუნველყოფისთვის 15,0 ათასი ლარი გაითვალისწინეს.

ახალციხის მუნიციპალიტეტის საკრებულოს ოპოზიციონერი დეპუტატი ფიქრობს, რომ როცა ბიუჯეტი იგეგმება ის გარკვეული კვლევის შედეგებზე უნდა იყოს აგებული. გარდა ამისა, მაკა სუდაძე აღნიშნავს, რომ ადგილობრივი ბიუჯეტის პროექტში სოციალური პროგრამებისთვის გათვალისწინებული თანხა ცოტაა, მაშინ როცა ანაზღაურებისთვის და ხარჯებისთვის 2 მილიონამდე ლარს ითვალისწინებენ.

„3 მილიონ 800 ათასიან ბიუჯეტში, 2 მილიონი სწორედ შრომის ანაზღაურებაზე და ხარჯებზე მიდის. სამედიცინო დახმარებისთვის კი 90 ათასი ლარია გათვალისწინებული. მიმაჩნია, რომ ცოტა არასწორად არის ბიუჯეტი დაგეგმილი“, – ამბობს ახალციხის მუნიციპალიტეტის საკრებულოს ფრაქცია „ერთიანი ნაციონალური მოძრაობის“ თავმჯდომარე მაკა სუდაძე და ამატებს, რომ ბიუჯეტი უფრო მეტად უნდა იყოს მორგებული სოციალურ საკითხებზე და არა ადმინისტრაციულ ხარჯებზე.

ახალციხის „სასოფლო საკონსულტაციო ცენტრის“ დირექტორის გურამ ჯინჭველაძის თქმით, ბიუჯეტის პროექტთან დაკავშირებით გარკვეული შენიშვნები აქვს. ამბობს, რომ ბიუჯეტში პრიორიტეტები სწორადაა გამოკვეთილი.

„აქ ძალიან მარტივადაა საქმე, ჩვენ განვიხილავთ ქალაქ ვალისა და მუნიციპალიტეტის სოფლების ბიუჯეტს. ეს მოსახლეობა პირველ რიგში ჩართულია სოფლის მეურნეობაში და რა თქმა უნდა სოფლის მეურნეობას უნდა მიექცეს დიდი ყურადღება. მელიორაციის გამართულობამ შეიძლება მკვეთრად შეცვალოს სოფლის მეურნეობის მდგომარეობა და ამაზე ყველაზე დიდი ყურადღება უნდა იყოს გამახვილებული“, – ამბობს გურამ ჯინჭველაძე.

ახალციხის მუნიციპალიტეტის გამგეობა ბიუჯეტის პროექტს შენიშვნებით საკრებულოს 25 ნოემბერს გადაუგზანვის. საბოლოო ბიუჯეტს კი მიმდინარე წლის ბოლომდე დაამტკიცებენ.



[თამარ თოთაძე, ახალციხე]