ახალციხემ 2018 წლის ბიუჯეტი დაამტკიცა

მომავალი წლის ბიუჯეტის დამტკიცებას ახალციხის მუნიციპალიტეტის საკრებულოში დეპუტატებმა კენჭი დღეს, 22 დეკემბერს უყარეს. სხდომას 33 დეპუტატიდან, 23 ესწრებოდა, აქედან ორი ოპოზიციური პარტიის „ნაციონალური მოძრაობისა“ და „ევროპული საქართველოს“ წევრები იყვნენ, ბიუჯეტს მხარი არცერთმა მათგანმა დაუჭირა.

საკრებულოს დეპუტატი „ნაციონალური მოძრაობიდან“ კობა სანდროშვილი ამბობს, რომ შენიშვნები თითქმის ყველა მუხლში ჰქონდა, მათ შორის ინფრასტრუქტურულ საკითხებთან დაკავშირებით–„არცერთი ჩვენი შენიშვნა არ იყო გათვალისწინებული, ამიტომ მე ამ ბიუჯეტის მხარდაჭერის პასუხისმგებლობას ვერ ავიღებდი“.

სანდროშვილის მსგავსად, 2018 წლის ბიუჯეტის დამტკიცებას მხარი არ დაუჭირა საკრებულოს დეპუტატმა „ევროპული საქართველოდან“ გელა დემეტრაძემ.

მისი თქმით, ბიუჯეტის პროექტის განხილვისას, არც მათი შენიშვნები გაითვალიწინეს: „მთავრი მიზეზი სწორედ ადმინისტრაციული ხარჯების გაზრდა იყო, ამის გამო მხარს ვერ დავუჭერდი“.

ახალციხის მუნიციპალიტეტის საკრებულოს თავმჯდომარე ამბობს, რომ მისთვის უცნობია, რა შენიშვნები ჰქონდათ ოპოზიციონერ დეპუტატებს, როგორც გელა ნოზაძე აცხადებს, ისინი კომისიაში ბიუჯეტის განხილვის არცერთ სხდომას დასწრებიან.

2018 წლის ბიუჯეტში მთავარი პრიორიტეტი ინფრასტრუქტურა იქნება. ამისთვის 4 630 800 ლარია გათვალისწინებული. 14 მილიონიდან 3 721 300 ლარი ადმინისტრაციული ხარჯია, – 926 300 ლარი საკრებულოსთვის და 2 721 300 ლარი მერიისთვის.

ახალციხის 2018 წლის ბიუჯეტიდან, 13 ააიპ –ი, 4.119.500 ლარს მიიღებს.



[ლუბა გიორგაძე, ახალციხე]