ძვირი წყალი

ვარდან შოლახიანს ახალქალაქში ავტოსამრეცხაო აქვს. იგი არაფრით თანხმდება მრიცხველის დამონტაჟებას, რადგან წყლის ფასს არარეალურად მიიჩნევს.

“დღეში 15 ტონამდე წყალს ვხარჯავ, ამიტომ ჩემთვის წამგებიანია. ბიზნესიდან შემოსული მთელი ფულიც რომ დავდო და სახლიდანაც რომ მოვიტანო, წყლის ხარჯის ანაზღაურებას მაინც ვერ შევძლებ. ხელმძღვანელობას მივმართეთ, რომ ასე არ შეიძლება მოხდეს, ამიტომ აუზებზე და სამრეცხაოებზე მონტაჟის პროცესი ჯერჯერობით შეაჩერეს”, - ამბობს იგი.

თუმცა საქართველოს გაერთიანებული წყალმომარაგების ახალქალაქის ფილიალის ხელმძღვანელობის თქმით, ყველა იურიდიულ პირს, მისი სურვილის მიუხედავად, ამა წლის 1 ოქტომბრამდე წყლის მრიცხველი უნდა დაუმონტაჟდეს. ან იურიდიულ პირს წყლის გამოყენებაზე უარის თქმის უფლება აქვს.

წყლის ფასი მაღალი ეჩვენებათ მაღაზიების მფლობელებსაც. ბერმა მრიცხველი უკვე დაამონტაჟა. ისინი ამბობენ, რომ საგადასახადადო სამსახურის შეეშინდათ.

ერთ-ერთი მაღაზიის მფლობელი, რომელმაც ვინაობის დასახელება არ მოისურვა, წყლის ფასზე ჩივის, თუმცა, ამბობს, რომ გადასახადს ჩვენების შესაბამისად გადაიხდის.

“დავაყენე, მაგრამ უკმაყოფილო ვარ. დღეში 2 კბ/მ წყალს ვხარჯავთ, თვეში დაახლოებით 240-250 ლარი გამოდის. კომუნალურ ხარჯებს მთელი შემოსავალი ვერ აუდის. ხელმისაწვდომი ფასი მაინც დაეწესებინათ. მრიცხველის დაწერილი გადასახადის გადახდის წინააღმდეგი არ ვარ, ვიცი, რომ ამას კანონი მოითხოვს, მაგრამ ფასი მისაღები უნდა იყოს”, - ამბობს იგი.

მეორე პრობლემა, რაც მრიცხველების დაყენების შემდეგ შეიქმნება, მკაცრი ზამთარია. 6-8 თვის განმავლობაში ყინვები 200ჩ-300ჩ -მდე აღწევს. წყლის მილების გაყინვისა და დასკდომის ასარიდებლად ხალხი იძულებულია ონკანები ღია დატოვოს.

საქართველოს გაერთიანებული წყალმომარაგების ახალქალაქის ფილიალში განმარტავენ, რომ 2012 წლის 1 ნოემბრიდან 2013 წლის 30 აპრილამდე მოსახლეობა წყლის გადასახადს არა მრიცხველის ჩვენების მიხედვით, არამედ ზაფხულის პერიოდის ხარჯიდან დადგენილი საშუალო ფასით გადაიხდის.

ერთ-ერთი საპარიკმახეროს მეპატრონეს ამ დაპირების არ სჯერა.

“წყალი ისედაც ყოველ ზამთარს იყინება და რა მოხდება, რომ მოვკეტო. მითხრეს, რომ სამი თვის გადასახადს არ აიღებენ, ზამთრის პერიოდის ფასდაკლებაზე ჩემთვის არაფერი უცნობებიათ. ვუთხარი, რომ დავთანხმდები, მაგრამ თუ მილები დასკდება, ყოველ ჯერზე თავისი ხარჯით დამიყენებენ ახალ მილებს. გამოდის, რომ მათთვის უნდა ვიმუშაო. წყალი თავისი დინებით მოდის აბლარიდან, რისთვის ხარჯავენ ფულს, რომ ჩვენგან მრიცხველით უნდათ ფულის მიღება”, - ჩივის იგი.

სასურსათო მაღაზიის მეპატრონეს არტიუშ კარაპეტიანს მრიცხველი უკვე აქვს, მაგრამ უკმაყოფილოა.

“უხარისხოდ დააყენეს, გასდის. თუ ზამთარში მილები გაიყინება, მაღაზიაში წყალს მოვხსნი, სხვა რა გზა მაქვს?!”, - ამბობს იგი.

ორგანიზაციებისა და იურიდიული პირების უკმაყოფილებას ისიც იწვევს, რომ მრიცხველის მონტაჟის ხარჯს ისინი თავად ანაზღაურებენ. მონტაჟი, მილის დიამეტრის შესაბამისად, 120-დან 225 ლარამდე ჯდება. წყალმომარაგების კომპანია, ისიც მხოლოდ უკიდურესი აუცილებლობის შემთხვევაში, მილის იმ მონაკვეთის კეთილმოწყობაზე იღებს პასუხისმგებლობას, რომელზეც მრიცხველი მონტაჟდება.

“როცა მილები კაფელის ან ბეტონის ქვეშაა, ბუნებრივია, ამ საფარის დაზიანება გვიწევს და ეს ხარჯიც მფლობელის ასანაზღაურებელია. თუ მილები იმ ადგილას, სადაც მრიცხველი უნდა დავაყენოთ, არანორმალურ მდგომარეობაშია, მილის ამ მონაკვეთს ჩვენი ხარჯით ვცვლით”, - ამბობს საქართველოს გაერთიანებული წყალმომარაგების ახალქალაქის ფილიალის შემოსავლების მენეჯერი გიორგი ვახტანგიშვილი.

გამრიცხველიანება ახალქალაქში 1 ივნისს დაიწყო. ქალაქში დაახლოებით 132 ორგანიზაცია მოქმედებს და მათგან 104-ს უკვე აქვს წყლის მრიცხველი. სამი თვის განმავლობაში მრიცხველები დამონტაჟდა გამგეობაში, საკრებულოში, ახალქალაქის სკოლებში, საბავშვო ბაღებში, მუზეუმში, მუსიკალურ და ჭადრაკის სკოლებში, კულტურის სახლსა და რამდენიმე მაღაზიაში.

“ორგანიზაციებს მრიცხველების დაყენების შესახებ წინასწარ ვაცნობეთ. პირველ რიგში, იქ დავამონტაჟეთ, სადაც ამის გაკეთება შედარებით ადვილი იყო”, - ამბობს ვახტანგიშვილი.

მრიცხველებს სამი სამკაციანი სამუშაო ჯგუფი ამონტაჟებდა. ორმა ბრიგადამ თვეზე მეტხანს იმუშავა. ამ ეტაპზე მხოლოდ ერთი ჯგუფი მუშაობს.

ახალქალაქის გაერთიანებული წყალმომარაგების ფილიალში არ უარყოფენ, რომ მრიცხველების დაყენებასთან დაკავშირებით ორგანიზაციებიდან საჩივრებია.

“მრიცხველებს ჩვენ კი არა, სახელმწიფო აყენებს. ხარჯებს რაც შეეხება, ვინც ამას ამბობს, არ ესმის, რომ ჩვენ წყალზე სხვა ქალაქებთან შედარებით გაცილებით მეტი ხარჯი გვაქვს, რადგან ხაზები ძველია. დღეში 2-3 ავარია შეიძლება მოხდეს, ესეც ხარჯია. გარდა ამისა, წყალს ქლორირებას ვუკეთებთ”, - ამბობს გიორგი ვახტანგიშვილი.

მრიცხველების დაპლომბვა მას შემდეგ დაიწყება, რაც დამონტაჟება დასრულდება. ამის შემდეგ გადახდასაც მოხმარებული წყლის მიხედვით დაიწყებენ. როგორ იმოქმედებს ეს ადგილობრივ ბიზნესზე, ზამთარში გაირკვევა.

[შუშან შირინიანი, ახალქალაქი]