ხანძთელის ქუჩაზე კორპუსის ფასადის რეაბილიტაციას ითხოვენ

ხანძთელის ქუჩაზე ე.წ „ფაბრიკის ბინაში“ დაახლოებით 60 ოჯახი ცხოვრობს.

„კორპუსი იმდენად დაზიანებულია, რომ დროდადრო ბათქაში ცვივა. ეზოში ბავშვები თამაშობენ, ხომ შეიძლება თავში ჩაეცეს?! 1980 წლიდან აქ ვცხოვრობ და ამ კორპუსში არაფერი გაკეთებულა. მხოლოდ სახურავი გადახურეს“,– ამბობს N32 –ში მცხოვრები ნინო ღონღაძე.

გარდა ფასადისა, ადგილობრივებს თქმით, კორპუსის სადარბაზოებიც მოსაწესრიგებელია.

„ყველაფერი დაზიანებულია კიბეები, კედლები. ყველაზე უყურადღებოდ ჩვენი კორპუსია. იქნებ ჩვენც მოგვხედონ ასე როგორ შეიძლება“,–ამბობს ადგილობრივი ლუიზა ინასარიძე.

ახალციხის მუნიციპალიტეტის მერია ქალაქში მრავალბინიანი საცხოვრებელი სახლების სახურავების, ფასადების, სადარბაზოების და მიმდებარე ინფრასტრუქტურის მოწყობას 2019 წლიდან იწყებს, რისთვისაც რეგიონებში განსახორციელებელი პროექტების ფონდიდან და ადგილობრივი ბიუჯეტიდან დაახლოებით 700 000 ლარი დაიხარჯება.

როდის იგეგმება კონკრეტულად ხანძთელის ქუჩაზე მდებარე კორპუსის რეაბილიტაცია მერიაში ვერ აკონკრეტებენ –„ქალაქში ეტაპობრივად ყველა კორპუსის ფასადის რეაბილიტაცია იგეგმება, თუმცა ზუსტად როდის, რომელი ბინის ფასადი შეკეთდება არ ვიცით“.

ადგილობრივმა თვითმმართველობამ ახალციხეში 34 კორპუსის ფასადის რეაბილიტაციისათვის საპროექტო–სახარჯთაღრიცხვო დოკუმენტების მოსამზადებლად ტენდერი ივლისში გამოაცხადა, თუმცა ამ ჩამონათვალში ხანძთელის კორპუსი არ არის.



[ლუბა გიორგაძე, ახალციხე]