კლინიკა „იმედში“ საავადმყოფომდე მისასვლელი გზის შეკეთებას ითხოვენ

„საავადმყოფოსთან მისასვლელი გზა გამოსულია მწყობრიდან, რის გამოც სამარშრუტო ავტობუსები მგზავრებს შუა გზაში ტოვებენ, ავადმყოფებს, ფეხმძიმე ქალებს და სხვებს სიარული ფეხით უხდებათ. გთხოვთ აღნიშნული გზის მონაკვეთის შეკეთებას“,–ეს იმ წერილის ამონარიდია,რომლიც კლინიკა „იმედის“ თანამშრომლებმა ახალციხის მერს, გიორგი კოპაძეს 2014 წლის 19 აგვისტოს მიწერეს.

კლინიკაში ამბობენ, რომ მიუხედავად მათი თხოვნისა, გზა ამ დრომდე არ მოასფალტებულა.

ახალციხის მუნიციპალიტეტის მერიაში განმარტავენ, რომ გზის მოასფალტება ნამდვილად სურთ, თუმცა როდის ჯერ არ იციან.

“ძალიან გვინდა, რომ გავაკეთოთ, ვნახოთ როგორ გაიწერება მომავალი წლის ბიუჯეტი. თუ ეს ვერ დაფინანსდება რეგიონული განვითარებისა და ინფრასტრუქტურის სამინისტროსგან, მაშინ შევეცდებით ადგილობრივი ბიუჯეტიდან გავაკეთოთ“, – ამბობს ახალციხის მერის მოადგილე ზაზა გელაძე.

რატომ ვერ მიდიან კლინიკამდე სამარშრუტო ტაქსები, ამ საკითხთან დაკავშირებით „სამხრეთის კარიბჭე“ შპს „ჯეოტივის“ ხელმძღვანელს ნუგზარ მამუკაშვილს ესაუბრა.

მისი თქმით, რადგან გზა ავარიულია საქალაქო ტრანსპორტი კლინიკამდე ხშირად ვერ მიდის.

„ძალიან ცუდი მონაკვეთია, ძვირიანი მანქანებია, ორმოში რომ ჩაარტყან და ნაწილი გატეხონ, მთელი თვე მის შესაძენად უნდა ვიმუშაოთ. იმ შემთხვევაში , როდესაც ავტობუსში მძიმე ავადმყოფია კლინიკამდე მივდივართ. გააკეთონ გზა და ჩვენი მხრიდან პრობლემა არ არის. მანამდე ვიდრე გაკეთდება ორმოები ხრეშით მაინც ამოავსონ შესვლა, რომ შევძლოთ. თანამშრომლების თხოვნით დილით და საღამოს მივდივართ კლინიკამდე“, – ამბობს შპს „ჯეოტივის“ ხელმძღვანელი ნუგზარ მამუკაშვილი.

შპს „ჯეოტივი“ ქალაქის მოსახლეობას 2007 წლიდან ემსახურება. კომპანიას ხელშეკრულება ახალციხის მერიასთან აქვს გაფრომებული. ქალაქში მგზავრობა 40 თეთრი ღირს, აქედან ნახევარს მგზავრი, ნახევარს კი მერია იხდის.


[თინათინ ზაზაძე, ახალციხე]