ახალციხის უნივერსიტეტამდე მისასვლელი გზის ნაწილი ავარიულია [Photo/Video]

ავარიულია 9 აპრილისა და რუსთაველის კვეთიდან უნივერსიტეტის პირველ კორპუსამდე საავტომობილო გზის დაახლოებით 800–მეტრიანი მონაკვეთი.

„გზაზე ორმოები ავარიულ სიტუაციებს ქმნის, ამიტომ გადაადგილება რთულია. ამ გზის გამო ხშირად მიფუჭდება მანქანა, მერე მისი შეკეთება კი თანხებთანაა დაკავშირებული“, – ამბობს სტუდენტი ვანიკო თოფუზიანი.

ავარიული გზის გამო ხშირად უზიანდება მანქანა როლანდ ნარიმანიშვილსაც: „ძნელია აქ გადაადგილება, მითუმეტეს ისეთი მძღოლებისთვის ვინც ეს გზა არ იცის. თუ ფრთხილად არ იყავი ავარიას თავიდან ვერ აიცილებ“.

დაახლოებით, 600 მეტრზე, გზის მარჯვენა მხარეს, დაზიანებულია ტროტუარიც. აქ ზოგან არც ასფალტია და წვიამიან ამინდში სტუდენტებს ატალახებულ გზაზე სიარული უწევთ.

„არის მიწიანი და წვიმაში ისე ტალახდება, რომ შეუძლებელია სუფთად მოხვიდე ლექციებზე. ახლა პრობლემა არ არის, დავდივართ, მაგრამ როგორც კი იწვიმებს ბევრი გუბე ჩნდება და სუფთად ვერ გაივლი“, – გვეუბნებიან სტუდენტები.



ახალციხეში, წელს რუსთაველის ქუჩის ნაწილს, 9 აპრილისა და საფარის მონასტრის გზის დასაწყისს შორის 337–მეტრიან მონაკვეთს, მოაასფალტებენ. თუმცა, გზის რეაბილიტაცია სწორედ იქ წყდება, საიდანაც უნივერსიტეტის პირველ კორპუსამდე მისასვლელი გზის 800–მეტრიანი ავარიული მონაკვეთი იწყება. შეკითხვაზე, რატომ ვერ მოხვდა გზის ეს ნაწილი სარეაბილიტაციო პროექტებში, ახალციხის მერიაში გვითხრეს რომ „საავტომობილო გზის ეს მონაკვეთი ორმულ შეკეთებას ექვემდებარება“.

ახალციხის მერია წელს არც ტროტუარის მოწყობას გეგმავს: „მიმდინარეობს საპროექტო დოკუმენტების მომზადება, მომავალი წლისთვის გავითვალისწინებთ ბიუჯეტში მის გაკეთებასაც“.









[თორნიკე ზაზაძე, ნანა ინასარიძე – ახალციხე]