არალში ადგილობრივებმა სადავო მიწა დაისაკუთრეს

ადიგენის მუნიციპალიტეტის სოფელ არალში მცხოვრებ 21 ოჯახს ეკონომიკის სამინისტრომ ე.წ. ორჭოსანის ტერიტორიაზე სადავო მიწის ნაკვეთები დაურეგისტრირა. ამის შემდეგ, როგორც სოფელ არალში მცხოვრებლები აცხადებენ „„Bp-მ“ 21–ვე ოჯახს კომპენსაცია მისცა.

„კომპენსაცია ყველამ მივიღეთ, მხოლოდ ამ 21 ოჯახიდან ერთი არ იყო საქართველოში და მერე მისი საკითხიც მოგვარდა“, – ამბობს არალში მცხოვრები ლავრენტი ჩილინგარაშვილი.

არალში მცხოვრებლების ადვოკატის ოთარ კაჭკაჭაშვილის თქმით, სასამართლოში სადავო მიწასთან დაკავშირებთ საქმის მსვლელობა აღარ გაგრძელდა: „საჩივარი უკვე გამოვიტანეთ“.

შეგახსენებთ, არალში მოსახლეობა სამხრეთ კავკასიური მილსადენის გაფართოების პროექტიდან კომპენსაციას ვერ იღებდა, რადგან აღმოჩნდა, რომ მიწა რომლის ფაქტობრივი მფლობელებიც თავად არიან და ამის დამადასტურებელი დოკუმენტებიც აქვთ, საჯარო რეესტრში რეგისტრირებული ეკონომიკის სამინისტროს ჰქონია. ამავე ფართობზე კი 2006 წელს სახელმწიფოს „საქნახშირისთვის“ 40–წლიანი ლიცენზია გაუცია.

აღნიშნულის გამო არლელებს სასამართლოში სარჩელი ჰქონდათ შეტანილი, თუმცა ვიდრე საქმის განხილვა დაიწყებოდა, „საქნახშირმა“ ლიცენზია გააუქმა.

[თამუნა უჩიძე, ადიგენი]