ვის მისცემს "ბიპი" კომპენსაციას არლელებს თუ „საქნახშირს“?

"ბიპი" ადიგენის მუნიციპალიტეტში ე.წ. ორჭოსანის ტერიტორიაზე სამხრეთ კავკასიური მილსადენის გაფართოების პროექტის მშენებლობის დასაწყებად ემზადება, აქ სადავო მიწების ამბავი კი ჯერ ისევ გადაუჭრელია.

„საქნახშირის“ გენერალური დირექტორის ტექნიკური მრჩეველი ზაზა გორდეზიანის განცხადებით, ამ დრომდე გადაწყვეტილი არაფერია: „მიდის საკითხის დამუშავება ჩვენსა და "ბიპს" შორის, რადგან ბიპის აქვს ჩვენ ტერიტორიაზე გაყვანლი გაზსადენი“.

გორდეზიანი აცხადებს, რომ ამ ტერიტორიაზე ლიცენზიას არ დათმობენ: „ამაში ნახევარ მილიონ ლარზე მეტი გვაქვს გადახდილი. მანდ პროექტების გასაკეთებლად კი 300 ათას დოლარამდე გვაქვს გახარჯული. ამიტომ გადაწყვეტილება სწორედ ჩვენსა და ბიპის შორისაა მისაღები, ვიდრე ჩვენსა და მთავრობას შორის“.

საწინააღმდეგოს აცხადებს "ბიპი". ახალციხის ადგილობრივ თვითმმართველობაში სამხრეთ– კავკასიური მილსადენის გაფართოების პროექტის შესახებ საინფორმაციო შეხვედრაზე, "ბიპის" საგარეო ურთიერთობების დირექტორმა გია ღვალაძემ განაცხადა, რომ არალში სადავო მიწების საკითხს მთავრობა მოაგვარებს.

„ეს საკითხი მთავრობამ უნდა დაარეგულიროს. ეს უნდა მოხდეს უახლოეს ერთ კვირაში და მაქსიმუმ ორ კვირაში, სამუშაოების განრიგი ისე გვაქვს გაწერილი, რომ სხვანაირად შეუძლებელია“, – განაცხადა შეხვედრაზე ღვალაძემ.

სახელმწიფო ქონების ეროვნულ სააგენტოში აცხადებენ, რომ შექმნილი ვითარების შესახებ მიმდინარეობს საქმის წარმოება: „გარემოს დაცვის სამინისტროდან ველოდებით პასუხს, მაგრამ ჯერ არ მიგვიღია“.

გარემოს დაცვის სამინისტროდან პასუხებს კითხვებზე მეორე კვირაა „სამხრეთის კარიბჭეც“ უშედეგოდ ელოდება.

„საქნახშირს“ უნდა რომ ფული მიიღოს ბიპისგან. გლეხები ნაკლებად აინტერესებთ. ამიტომ ჩვენ დაახლოებთ სამ დღეში საქმეს სასამართლოში შევიტანთ“, – ამბობს არალში მცხოვრები ლავრენტი ჩილინგარაშვილი, რომელსაც თანასოფლელების მსგავსად ორჭოსანის ტერიტორიაზე 10 მეასედი მიწის ფართობი აქვს და ჯერ საჯარო რეესტრში ვერ იკანონებს.

შეგახსენებთ, არალში მოსახლეობა სამხრეთ კავკასიური მილსადენის გაფართოების პროექტიდან კომპენსაციას ვერ იღებს, რადგან აღმოჩნდა, რომ მიწა რომლის ფაქტობრივი მფლობელებიც თავად არიან და ამის დამადასტურებელი დოკუმენტებიც აქვთ, საჯარო რეესტრში რეგისტრირებული ეკონომიკის სამინისტროს ჰქონია. ამავე ფართობზე კი 2006 წელს სახელმწიფოს „საქნახშირისთვის“ 40–წლიანი ლიცენზია გაუცია.

[თამუნა უჩიძე, ახალციხე]