არალში ადგილობრივებს სადავო მიწას დაუსაკუთრებენ

არალში ე.წ. ორჭოშანის სადავო ტერიტორიაზე „საქნახშირს“ საკუთარი განცხადების საფუძველზე ლიცენზია გაუუქმეს.

„ლიცენზია ჩვენი მიმართვის საფუძველზე გაუქმდა, რადგან იმ ტერიტორიაზე, სადაც ნახშირი უნდა მოგვეპოვებინა, მილსადენმა გაიარა და ფაქტობრივად, მუშაობა შეუძლებელია“, – ამბობს „საქნახშირის“ გენერალური დირექტორის ტექნიკური მრჩეველი ზაზა გორდეზიანი.

თუმცა, აღსანიშნავია, რომ „საქნახშირი“ ლიცენზიის დათმობას არ აპირებდა, გორდეზიანი „სამხრეთის კარიბჭესთან“ სამი თვის წინ აცხადებდა, რომ ამ ლიცენზიაში კომპანიას ნახევარ მილიონ ლარზე მეტი ჰქონდა გადახდილი, ამ კონკრეტულ ტერიტორიაზე კი პროექტების მოსამზადებლად 300 ათასი დოლარი: „ამიტომ გადაწყვეტილება სწორედ ჩვენსა და ბიპის შორისაა მისაღები, ვიდრე ჩვენსა და მთავრობას შორის“.

კითხვაზე, დათმო თუ არა ლიცენზია „საქნახშირმა“ „ბიპიდან“ მიღებული კომპენსაციის სანაცვლოდ, გორდეზიანი გვპასუხობს, რომ ამის შესახებ არაფერი იცის: „მე ტექნიკურ საკითხებს ვაგვარებ მხოლოდ“.

რატომ დათმეს ლიცენზია და მიიღეს თუ არა სანაცვლოდ „ბიპისგან“ კომპენსაცია, ამაზე არც „საქნახშირის“ ახალდანიშნული დირექტორი ვახტანგ ჩხეიძე საუბრობს. „სამხრეთის კარიბჭემ“ ამის გადამოწმება „ბიპისთან“ სცადა, თუმცა, ორგანიზაციის საზოგადოებასთან ურთიერთობის სამსახურის ხელძღვანელის თამილა ჩანტლაძის მობილური ტელეფონი მეორე დღეა მიუწვდომელია.

ლიცენზიის გაუქმების შემდეგ კი არალში მაცხოვრებლები სადავო ტერიტორიის საკუთრებაში გაფორმებას, შემდეგ კი „ბიპისგან“ კომპენსაციის მიღებას ელოდებიან.

„მეორე კვირაა ეკონომიკის სამინისტროს თანხმობას ველოდებით, „ბიპის“ წარმომადგენელმა გვითხრა, რომ ახლა ყველაფერი მოგვარდება. ეკონომიკის სამინისტროში კი დაგვიანების მიზეზად თბილისში მომხდარი სტიქიური უბედურება დაგვისახელეს“, – ამბობს არალში მცხოვრები ლავრენტი ჩილინგარაშვილი.

ეკონომიკის სამინისტროში კი აცხადებენ, რომ სამინისტრო ადგილობრივებისთვის სადავო მიწების გაფორმების შესახებ მას შემდეგ იმსჯელებს, რაც არლელები უწყებას წერილობით მიმართავენ. თუმცა ამ დრომდე არლიდან ეკონომიკის სამინისტროში წერილი არ შესულა.

მიუხედავად იმისა, რომ პრობლემა ადგილობრივების სასარგებლოდ წყდება, ამ დრომდე საქმე, რომელიც არალში საკუთრების საკითხს ეხება, სასამართლოში რჩება.

„ჯერ განხილვა არ დაწყებულა რადგან ბაჟი არაა გადახდილი, – ამბობს არალში მაცხოვრებლების ადვოკატი ოთარ კაჭკაჭაშვილი და ამატებს, – „თუ სადავო ტერიტორიაზე ლიცენზია გაუქმდა, აქ ავტომატურად უნდა დაიწყოს საჯარო რეესტრმა მესაკუთრეებად მათი დარეგისტრირება და მოგვწერონ ჩვენ, რომ დავის საფუძველი არ არსებობა“.

[თამუნა უჩიძე, ადიგენი]