BP: სახელმწიფომ არალში მიწების საკითხი ორ კვირაში უნდა დაარეგულიროს

ამის შესახებ დღეს, 18 თებერვალს, ახალციხის ადგილობრივ თვითმმართველობაში სამხრეთ– კავკასიური მილსადენის გაფართოების პროექტის შესახებ საინფორმაციო შეხვედრაზე, BP–ის საგარეო ურთიერთობების დირექტორმა გია ღვალაძემ განაცხადა.

მისი განცხადებით, ადიგენის მუნიციპალიტეტის სოფელ არალში სადავო მიწების საკითხთან დაკავშირებით, მოლაპარაკებები მთავრობასთან რამდენიმე თვეა ინტენსიურად მიმდინარეობს.

„საქმის კურსშია ეკონომიკის სამინისტრო, კალაძე და მისი მოადგილეც. ჩვენ შევხვდით კორპორაციასაც (საქნახშირი), ეს პრობლემა გვარდება და ამას გარკვეული დრო სჭირდება“, – ამბობს ღვალაძე.

მისი თქმით, ეს საკითხი მთავრობამ უნდა დაარეგულიროს: „ეს უნდა მოხდეს უახლოეს ერთ კვირაში და მაქსიმუმ ორ კვირაში, სამუშაოების განრიგი ისე გვაქვს გაწერილი, რომ სხვანაირად შეუძლებელია“.

ღვალაძის თქმით, მას შემდეგ რაც არალში მიწების საკითხი დარეგულირდება, მოსახლეობას საქმე უკვე BP–ისთან ექნება: „იმის შემდეგ რაც მოსახლეობას ყველანაირი პრობლემა მოეხსნება, ჩვენ კომპენსაციას გავცემთ მათზე, ისე როგორც ამას ვაკეთებთ ხოლმე და როგორცაა ეს წესით დადგენილი“.

კითხვაზე მისი პასუხი გულისხმობს თუ არა იმას, რომ მოლაპარაკებების პროცესი ადგილობრივებისთვის მიწის დაკანონებისკენ მიდის, გვპასუხობს:„აღიარებს სახელმწიფო, რომ ის არის კერძო. ჩვენ მხოლოდ იმ შემთხვევაში გავცემთ კომპენსაციას, თუ კერძო საკუთრება სახელმწიფო რეესტრშია რეგისტრირებული“.

მისი განცხადებით, ამ საკითხთან დაკავშირებით მოლაპარაკებების პროცესი ცოტა დროში გაიწელა: „ამ შემთხვევაში ხელს მთავრობისკენ გავიშვერ. მთავრობა აღიარებს იმას რომ ეს მისი მისახედია“.

მომხდარში მთავრობის დანაშაულს ვერ ხედავს სამცხე–ჯავახეთის გუბერნატორი აკაკი მაჭუტაძე, იგი აცხადებს, რომ მხარეებს მოლაპარაკებისა და შეთანხმებისთვის ხელს შეუწყობს.

რას გეგმავს მთავრობა სადავო მიწების საკითხთან დაკავშირებით ჯერ უცნობია. გარემოსდაცვის სამინისტროსგან, (რომელიც ლიცენზიანტთანაა პასუხისმგებელი), კითხვებზე პასუხს „სამხრეთის კარიბჭე“ კვირაზე მეტია ელოდება. ასევე ველოდებით პასუხს ეკონომიკის სამინისტროდანაც. ამასობაში კი არლელები სასამართლოში სარჩელის შესატანად ემზადებიან.

შეგახსენებთ, არალში მოსახლეობა სამხრეთ კავკასიური მილსადენის გაფართოების პროექტიდან კომპენსაციას ვერ იღებს, რადგან აღმოჩნდა, რომ მიწა რომლის ფაქტობრივი მფლობელებიც თავად არიან და ამის დამადასტურებელი დოკუმენტებიც აქვთ, საჯარო რეესტრში რეგისტრირებული ეკონომიკის სამინისტროს ჰქონია. ამავე ფართობზე კი 2006 წელს სახელმწიფოს „საქნახშირისთვის“ 40–წლიანი ლიცენზია გაუცია.



[თამუნა უჩიძე, ახალციხე]