არალში სადავო მიწის საკითხი ადგილობრივების სასარგებლოდ გადაწყდა

ამის შესახებ „სამხრეთის კარიბჭეს“ ეკონომიკის სამინისტროში განუცხადეს.

„ეს საკითხი კომიტეტზე უკვე განიხილეს, ბრძანება გამოცემულია, საკითხი მოსახლეობის სასარგებლოდ გადაწყდა, უბრალოდ ტექნიკური საკითხები დარჩა მოსაგვარებელი. საჯარო რეესტრში ჩვენგან წერილი გაიგზავნება და ამის შემდეგ მიწები მათ საკუთრებაში დარეგისტრირდება“, – განმარტეს ეკონომიკის სამინისტროს პრესსამსახურში;

აღნიშნული გადაწყვეტილების შესახებ სამინისტროს ადგილობრივებისთვის წერილობით ჯერ არ უცნობებია.

„ათი დღე უკვე გავიდა და პასუხს ველოდებით“, – ამბობს არალში მცხოვრები ლავრენტი ჩილინგარაშვილი.

მას შემდეგ რაც სადავო მიწებს ადგილობრივებს დაურეგისტრირებენ, „ბიპი“ მათ კომპენსაციას გადასცემს.

შეგახსენებთ, არალში მოსახლეობა სამხრეთ კავკასიური მილსადენის გაფართოების პროექტიდან კომპენსაციას ვერ იღებს, რადგან აღმოჩნდა, რომ მიწა რომლის ფაქტობრივი მფლობელებიც თავად არიან და ამის დამადასტურებელი დოკუმენტებიც აქვთ, საჯარო რეესტრში რეგისტრირებული ეკონომიკის სამინისტროს ჰქონია. ამავე ფართობზე კი 2006 წელს სახელმწიფოს „საქნახშირისთვის“ 40–წლიანი ლიცენზია გაუცია.

აღნიშნულის გამო არლელებს სასამართლოში სარჩელი ჰქონდათ შეტანილი, თუმცა ვიდრე საქმის განხილვა დაიწყებოდა, „საქნახშირმა“ ლიცენზია გააუქმა.

[თამუნა უჩიძე, ახალციხე]