სტენსილები ახალციხის ქუჩებში [Photo]

მთავარი → საზოგადოება 22.11.2015

„ადრეული ქორწინება ტვირთია“, „თანასწორობა ოჯახიდან იწყება“, „სახლი სადაც ძალადობას განიცდი, სახლი არ არის“, - ახალციხის ქუჩებში სტენსილები გამოჩნდა.

გენდერული თანასწორობის, ოჯახური ძალადობისა და ნაადრევი ქორწინების თემაზე სტენსილები ახალციხის ცენტრალური პარკისა და უნივერსიტეტის კორპუსების მიდებარედ გაჩნდა. თანაქალაქელებს მესიჯები ახალციხის ახალგაზრდული გენდერული კლუბის წევრებმა დაუტოვეს.

ახალციხის გენდერული კლუბი ეროვნულ-დემოკრატიული ინსტიტუტის მიერ დაფინანსებული პროექტის "ერთად გენდერული თანასწორობისთვის" ფარგლებში შეიქმნა. პროექტს სამცხე-ჯავახეთის მედია ცენტრი ახორციელებს.

„ეს აქცია მიეძღვნა ქალთა მიმართ ძალადობის საერთაშორისო დღეს, რომელიც 25 ნოემბერს აღინიშნება. საინფორმაციო კამპანიის მიზანია საზოგადოება დააფიქროს იმ პრობლემებზე, როგორიცაა ადრეული ქორწინება, ოჯახში ძალადობა და გენდერული უთანასწორობა შინ თუ გარეთ“, – ამბობს პროქტის კოორდინატორი ახალციხეში თამუნა კაპანაძე.

მსგავსი საინფორმაციო კამპანია დაგეგმილია მარნეულში, ბორჯომსა და ნინოწმინდაშიც.

შეგახსენებთ, საქართველოში ადრეული ქორწინების წინააღმდეგ მასშტაბური კამპანია მიმდინარეობს. ამ კამპანიის ფარგლებში, თბილისსა და რეგიონებში 25 ნოემბერს აქციაა დაგეგმილი.

სტენსილები ახალციხის ქუჩებში [Photo]