ახალციხეში გენდერულ ძალადობაზე იმსჯელეს

სახალხო დამცველის გენდერული თანასწორობის დეპარტამენტისა და USAID-ის დემოკრატიული ჩართულობის ცენტრის ერთობლივი ორგანიზებით, გენდერული ძალადობის წინააღმდეგ მიმართული საერთაშორისო კამპანიის ფარგლებში, სახალხო დამცველის აპარატმა ახალციხეში ერთღიანი ტრენინგი ჩაატარა.

„აქტივობა იყო ძალიან მაღალი, ვისაუბრეთ მნიშვნელოვან თემაზე, რაც თანასწორობას და ძალადობის წინააღმდეგ ბრძოლას ეხება. ყურადღება გამახვილდა სტერეოტიპებზე ოჯახსა და საზოგადოებაში, იმაზე, რაც გავლენას ახდენს საზოგადოებრივ კეთილდღეობასა და სახელმწიფოს დემოკრატიულ განვითარებაზე“,- ამბობს სახალხო დამცველის ოფისის გენდერული თანასწორობის დეპარტამენტის უფროსი ეკატერინე სხილაძე.

ერთდღიან ტრენინგში მონაწილეობა დემოკრატიული ჩართულობის ცენტრებთან არსებულმა ქალთა კლუბებმა, გენდერული თანასწორობის საკითხებით დაინტერესებულმა სტუდენტებმა, სათემო ლიდერებმა, მასწავლებლებმა, ექიმებმა, ჟურნალისტებმა და სამოქალაქო საზოგადოების სხვა წევრებმა მიიღეს.

შეხვედრაზე აჩვენეს ანიმაციური ფილმები ქალისა და მამაკაცის გენდრულ როლებზე არსებული სტერეოტიპული შეხედულებების შესახებ და ოჯახში გენდერული როლის გადანაწილების შესახებ. ამავე თემაზე მონაწილეებმა შეასრულეს სავარჯოშოებიც.

[თინათინ ზაზაძე, ახალციხე]