'ენერგო–პრო ჯორჯიამ' უამინდობის გამო 430 000 ლარის ზარალი მიიღო

სს "ენერგო–პრო ჯორჯიაში" განმარტავენ, რომ უამინდობის გამო ყველაზე დიდი ზარალი ზემო აჭარის, გორის, ხაშურის, ჭიათურის, ახალქალაქისა და დმანისის მომსახურების ცენტრებში დაფიქსირდა. კომპანიის მიერ მიღებული ზარალის საერთო ოდენობამ 430 000 ლარი შეადგინა.

კომპანიის ინფორმაციით, რეგიონებში ძლიერი ქარისა და წვიმის, ხოლო მაღალმთიან ზონებში თოვლის გამო, დაბალი და მაღალი ძაბვის ქსელში საერთო ჯამში 385 საყრდენი ბოძი და 15 ძალოვანი ტრანსფორმატორი დაზიანდა; გარდა ამისა, სხვადასხვა ტიპის დაზიანებებს ჰქონდა ადგილი მაღალი ძაბვის ქვესადგურში და ელექტროენერგიის გადამცემ ხაზებზე; მწყობრიდან გამოვიდა 13 ქვესადგური და 17 გადამცემი ხაზი.

"რთული კლიმატური პირობების მიუხედავად, ენერგო-პრო ჯორჯიას ტექნიკურმა ბრიგადებმა მაქსიმალურად მოკლე დროში, ოპერატიულად განახორციელეს დაზიანებული ქსელის რეაბილიტაცია და აღადგინეს ელექტროენერგიის მიწოდება ყველა გათიშულ რეგიონში. რეაბილიტაცია მიმდინარეობდა როგორც დასავლეთ, ისე აღმოსავლეთ საქართველოში; აღდგენითი სამუშაოები გაგრძელდა ორი დღე", – ნათქვამია 'ენერგო–პრო ჯორჯიას' მიერ გავრცელებულ განცხადებაში.

შეგახსნებეთ, რომ უამინდობის გამო 12–14 ნოემბერს 2000–დან –5000–მდე აბონენტი იყო გამორთული, დაზიანებული იყო ელექტროგადამცემი ხაზები და ფიდერები.

[თამარ თოთაძე, ახალციხე]