‘ევექსმა’ სამცხე–ჯავახეთში ექთნების უფასოდ გადამზადება დაიწყო

სამედიცინო კორპორაცია „ევექსმა“ ექთნების გადამზადების პროგრამის განხორციელება სამცხე–ჯავახეთში დღეს, 26 ოქტომბერს დაიწყო.

პროექტის მონაწილე 45 ექთანი, კვალიფიკაციის ამაღლების მიზნით თეორიულ და პრაქტიკულ სწავლებას ახალციხის სამედიცინო დაწესებულებაში გაივლის. კურსის დასრულების შემდეგ კი გამოცდას ჩააბარებს და თუ თავს წარმატებით გაართმევს, „ევექსი“ მათ საკუთარი ჰოსპიტალების ქსელში დაასაქმებს.

„ქვეყანაში ექთნების დიდი დეფიციტია, ზოგადად, ამ პროფესიითაც აღარ ინტერესდებიან. ამიტომ ეს პროგრამა მიზნად სწორედ ასეთი დეფიციტის შევსებას ისახავს“, – ამბობს სამქედიცინო კორპორაცია „ევექსის“ სასწავლო ცენტრის დირექტორი გიორგი ბერაია და ამატებს, რომ აღნიშნული პროექტით იმ ადამიანს, რომელსაც ეს პროფესია დამთავრებული, თუმცა მივიწყებული აქვს, აძლევს შანსს, რომ ჯერ გადამზადება გაიაროს, შემდეგ კი თავისი დასაქმდეს.

სწორედ ასეთია პროექტის ერთ–ერთი მონაწილე ნანა თუმანიშვილი. იგი საექთნო პროფესიას რუსეთში დაეუფლა, წლები ადიგენის საავადმყოფოში ექთნად იმუშავა, ბოლო 12 წლის განმვალობაში კი ამ მიმართულებით აღარაფერი გაუკეთებია: „მინდა თანამედროვე მეთოდებსა და სტანდარტებს გავეცნო, მედიცინა ეს ჩემი საქმეა. ვფიქრობ რომ სასწავლო კურსს წარმატებით დავასრულებ და დავსაქმდები კიდეც“.

პროგრამის ხანგრძლივობა 8 თვეა. მონაწილეები თეორიულ და პრაქტიკულ მეცადინეობებს ახალციხის სამედიცინო დაწესებულებაში გაივლიან.
„იმისთვის, რომ ამ პროგრამაში ჩაერთო, საჭიროა გქონდეს აკრედიტებული სასწავლებლის დიპლომი, ან ასევე აკრედიტებულ სასწავლებელში იყო დამამთავრებელი კურსის სტუდენტი“, – ამბობს გიორგი ბერაია.

მას შემდეგ რაც 45 ექთნის გადამზადება დასრულდება, „ევექსი“ მიღებას ისევ გამოაცხადებს.

[თამუნა უჩიძე, ახალციხე]