პირველად საქართველოში – იხსნება საერთაშორისო დონის საექთნო კოლეჯი

შეხვედრა სამედიცინო დაწესებულება „უნიმედი სამცხე“–ს საკონფერენციო დარბაზში შედგა. ღია კარის დღეს სტუდენტები, სკოლის მოსწავლეები და საავადმყოფოს მედპერსონალი დაესწრო.

დავით ტვილდიანის სამედიცინო კოლეჯის წარმომადგენლები შეკრებილებს უნივერსიტეტის შესახებ ესაუბრნენ.

მათი განმარტებით, საექთნო კოლეჯი საქართველოში საერთაშორისო სტანდარტების შესაბამის ექთნებს მოამზადებს, რაც ქვეყანაში საექთნო საქმის განვითარებას შეუწყობს ხელს. კოლეჯის სასწავლო პროგრამა აშშ-ს ექთნების სალიცენზიო გამოცდის (NCLEX)-ის მოთხოვნების შესაბამისადაა აგებული და როგორც ქართულ, ისე ინგლისურენოვან ჯგუფებს გამოუშვებს.

კოლეჯის სასწავლო პროგრამა 2 წლიანია. სტუდენტთა მიღება ორ ნაკადად განხორციელდება: თებერვალსა და სექტემბერში.

უკვე ცნობილია, რომ მაღალრეიტინგული სტუდენტების სწავლის საფასურს „სამედიცინო კორპორაცია ევექსი“ დააფინანსებს, ასევე კორპორაცია სტუდენტებისთვის შეღავათიანი სასწავლო კრედიტის გაცემას უზრუნველყოფს.

კომპანია „ევექსის“ საექთნო დეპარტამენტის დირექტორის, თანარ დაუსის თქმით, კომპანია 20 საუკეთესო სტუდენტს სწავლის საფასურს მთლიანად დაუფარავს: „დანარჩენი სტუდენტებისთვის გაიცემა გრანტები, სტუდენტური სესხის სახით. სტუდენტები თანხას დასაქმების შემდეგ დააბრუნებენ“.

გარდა ამისა, როგორც „ევექსში“ აცხადებენ, კოლეჯის კურსდამთავრებულებს კორპორაციის ქსელში შემავალ კლინიკებში დაასაქმებენ: „ამასთანავე საექთნო კოლეჯის კურსდამთავრებულებს შესაძლებლობა მიეცემათ ჩააბარონ აშშ-ს საექთნო სალიცენზიო გამოცდა (NCLEX), რომელიც მათ აშშ-ს მწვანე ბარათსა (Green Card) და ამერიკის სამედიცინო დაწესებულებებში მუშაობის უფლებას მისცემს“.

დავით ტვილდიანის სამედიცინო უნივერსიტეტის პრეზიდენტი დიმიტრი ტვილდიანის განმარტებით, ეს კოლეჯი შესანიშნავი შანსია ექთნობის მსურველებისთვის: „ვეპატიჟებით ყველას, ვისაც უნდა, რომ მედიცინის სფეროში იმუშაოს“.

სამედიცინო კოლეჯში პირველი ნაკადი სწავლას 2016 წლის თებერვალში დაიწყებს. კოლეჯში სწავლის მსურველებმა ორი გამოცდა უნდა ჩააბარონ: მათემატიკასა და ბიოლოგიაში.

დავით ტვილდიანის სამედიცინო უნივერსისტეტის საექთნო კოლეჯი და „სამედიცინო კორპორაცია ევექსი“ ღია კარის დღეებს საქართველოს სხვადასხვა რეგიონში გამართავს. ხვალ, 18 დეკემბერს, ღია კარის დღე ქუთაისსა და ზუგდიდში გაიმართება, 19 დეკემბერს – აჭარაში, 21 დეკემბერს – კახეთში, 27 დეკემბერსა და 24 იანვარს კი თბილისში.



[ვარლამ წიკლაური, ახალციხე]