ადიგენში სასაფლაოს საკითხს რელიგიის სააგენტო განიხილავს

მეოთხე თვეა ადიგენის მუსლიმი თემი და მუსლიმთა სამმართველო ადიგენის მუნიციპალიტეტის გამგეობიდან სასაფლაოებისთვის ადგილის გამოყოფის შესახებ პასუხს ელოდებიან.

სოფელ ადიგენში ქრისტიანულმა თემმა მუსლიმებს ამავე სოფლის მკვიდრის დასაფლავების უფლება არ მისცეს. ამიტომ უმცირესობის წარმომადგენლები საფლავისთვის სოფელში ადგილის გამოყოფას ადიგენის მუნიციპალიტეტის გამგეობიდან ითხოვენ.

„გამგეობამ ეს განცხადება განსახილველად რელიგიის სააგენტოს გადაუგზავნა. იმედია, ღმერთით დადებითად გადაწყდება“, – ამბობს სამცხე–ჯავახეთის მუფთი მამუკა ვაშაყმაძე.

განცხადება განსახილველად რელიგიის საკითხთა სახელმწიფო სააგენტოში რომ გადაიგზავნა, ამას ადიგენის ადგილობრივ თვითმმართველობაშიც ადასტურებენ. გამგეობამ აღნიშნული საკთხის შესახებ სააგენტოს დაახლოებით ერთი თვის წინ მიმართა.

„ეს საკითხი მომავალ კვირაში კომისიის სხდომაზე განსახილველად გადის და გადაწყვეტილებასაც მივიღებთ“, – აცხადებს „სამხრეთის კარიბჭესთან“ რელიგიის საკითხთა სახელმწიფო სააგენტოს ხელმძღვანელი ზაზა ვაშაყმაძე.

შეკითხვაზე, რატომ არის სასაფლაოების საკითხის განხილვა სააგენტოს ქვემდებარე, ვაშაყმაძემ გვიპასუხა: „კომისიაზე გადის ეგ საკითხი განსახილველად და დაკმაყოფილედება თუ არ დაკმაყოფილდება პასუხს გაიგებთ“.

ადგილობრივი თვითმმართველობის საკითხებში ექსპერტის დავით ლოსაბერიძის განარტებით, რელიგიურ საკითხებს თვითმმართველობა ვერ განიხილავს, თუმცა საფლავების მოვლა–პატრონობა სწორედ თვითმმართველობის ექსკლუზიური უფლებაა.

„ადგილობრივმა თვითმმართველობამ თადარიგი დაიჭრია და თავი დაიზღვია, ამიტომ მიმართა რელიგიის სააგენტოს, რომელიც ალბათ რაღაც რეკომენდაციას მისცემს“, – ამბობს ლოსაბერიძე და ამატებს, რომ ამ შემთხვევაში ვერც ერთს მიედავები და ვერც მეორეს – „ველური პრობლემაა, რომ ადამიანი გარდაიცვალა და დაკრძალვის საშაულებას არ აძლევენ. ვინც ეს გააკეთა წარმართია. თუ ვინეს ასეთი საქციელი ქრისტიანობა ჰგონია, ძალიან ცდება“.

შეგახსენებთ, ადიგენის მუნიციპალიტეტის სოფელ ზანავში ქრისტიანის, სოფელ ადიგენში კი მუსლიმის დასაფლავების პრობლემა შეიქმნა. ამის გამო ორივე სოფელში მუსლიმი და ქრისტიანი თემი ერთმანეთს დაუპირისპირდა. მისცემს თუ არა ადგილობრივი თვითმმართველობა, როგორც ქრისტიან, ასევე, მუსლიმ თემს სოფელში ახალი სასაფლაოს გახსნის უფლებას, ჯერ უცნობია.

[თამუნა უჩიძე, ახალციხე]