მერია: თანამშრომელი, რომელმაც ჟურნალისტებს შეურაცხყოფა მიაყენა, სამსახურებრივ უფლებამოსილებას არ ასრულებდა

„ალექსანდრე ჭაღიაშვილი ნამდვილად მუშაობს ახალციხის მერიის ინფრასტრუქტურის სამსახურში, თუმცა, დღევანდელ ინციდენტს, რაც ადგილობრივი მედია საშუალებებით გავრცელდა, არანაირი კავშირი არ აქვს მის სამსახურეობრივ უფლებამოსილების შესრულებასთან. ინციდენტის ადგილზე ის იმყოფებოდა ოჯახის წევრის სტატუსით“, – აცხადებენ ახალციხის მერიაში.

შეგახსენებთ, დღეს, 9 ოქტომბერს, დაახლოებით 20:30 საათზე, ალექსანდრე ჭაღიაშვილმა, „სამხრეთის კარიბჭესა“ და ტელეკომპანია „მე–9 არხის“ ჟურნალისტებს, რომლებიც ახალციხეში, ერთ–ერთ ქუჩაზე მომხდარ ხანძარს აშუქებდნენ, სიტყვიერი შეურაცხყოფა მიაყენა, კამერების დამტვრევით დაემუქრა და ადგილის დატოვება მოსთხოვა.

მომხდარზე „სამხრეთის კარიბჭემ“ ოფიციალური განცხადება გაავრცელა. ამ განცხადებაშიც აღნიშნულია, რომ ჭაღიაშვილი იმ ოჯახის სიძეა, ვის სახლშიც სათავსო იწვოდა. შემთხვევის ადგილას იგი ნამდვილად არ იმყოფებოდა სამსახურებრივი სტატუსით, თუმცა, ეს მას არ აძლევს უფლებას ჟურნალისტებს სიტყვიერი და ფიზიკური შეურაცხყოფა მიაყენოს.

[ნინო ნარიმანიშვილი, ახალციხე]