ახალციხის მერიის თანამშრომელმა ‘სამხრეთის კარიბჭეს’ ჟურნალისტებს შეურაცხყოფა მიაყენა [Video]

შემთხვევა დღეს, 9 ოქტომბერს, ღამით, დაახლოებით 20:30 საათზე მოხდა. „სამხრეთის კარიბჭეს“ გადამღები ჯგუფი ახალციხეში, ახალციხელის ქუჩაზე გაჩენილ ხანძარს იღებდა. „სამხრეთის კარიბჭე“ დაზარალებულ მიშა მამუკაშვილთან ინტერვიუს იწერდა, რა დროსაც ჟურნალისტს ალექსანდრე ჭაღიაშვილი მიუახლოვდა და ტერიტორიის დატოვება მოსთხოვა.

„ხელს რატო უშლით მუშაობაში“, – ხმამაღლა მიმართა ჭაღიაშვილმა ჟურნალისტს და ჟურნალისტის ნათქვამზე: „მე რატო გიშლით, გვერდზე ვდგავარ, ხელს რატო გიშლით“, – გააგრძელა: „მე მიშლით ხელს, რა დროს მაგ კითხვების დასმაა“.

„დამპლებო, უნამუსოებო, რა დროს გადაღებაა, გაეთრიეთ აქედან. რა დროს მაგ კითხვების დასმაა“, – ამ სიტყვებით მიმართა ჭაღიაშვილმა ადგილობრივი ტელეკომპანია „მე–9 არხის“ ჟურნალისტებსაც, რომლებიც ასევე აშუქებდნენ მომხდარს და კოლეგის დაცვა სცადეს.

ჭაღიაშვილმა ჟურნალისტებისთვის ხელისშეშლა ამის შემდეგაც რამდენჯერმე სცადა.

„რა მომეცი? კაცს რომ ველაპარაკები უნდა გადაიღო? გაეთრიეთ აქედან... დაგამტვრევთ მაგ კამერებს“, – მიმართა ჟურნალისტს, რომელიც მობილური ტელეფონით ხანძრის გადაღებას ცდილობდა.

„ა ეგ გადაიღე, რომ მეორე მანქანა არ არის“, – განმეორებით მიაყენა ჭაღიაშვილმა შეურაცხყოფა ჟურნალისტებს და ხელი ჰკრა.

შემთხვევას შეესწრნენ სამართალდამცველებიც, თუმცა, მათ ჟურნალისტების დაცვა არ უცდიათ.

„სამხრეთის კარიბჭემ“ მოახერხა მობილური ტელეფონით ხელის შეშლის ამსახველი კადრების ნაწილი გადაეღო.

გთავაზობთ ვიდეომასალებს:







გარდა ამისა, არსებობს ხელის შეშლის მცდელობის დამადასტურებელი აუდიო ჩანაწერებიც, რომელსაც საჭიროების შემთხვევაში „სამხრეთის კარიბჭე“ გადასცემს სამართალდამცავ უწყებებს.

აქვე აღვნიშნავთ, რომ როგორც მოგვიანებით გაირკვა, ალექსანდრე ჭაღიაშვილი დაზარალებულების ახლობელია. შემთხვევის დროს იგი იქ არ იმყოფებოდა, მერიის თანამშრომლის სტატუსით, თუმცა, ეს მას არ ათავისუფლებს საჯარო მოხელის თმენის ვალდებულებისგან.

აღსანიშნავია, რომ ეს ახალციხის მერიის თანამშრომლების მხრიდან ჟურნალისტებისთვის მუშაობაში ხელის შეშლის პირველი მცდელობა არ არის. „სამხრეთის კარიბჭე“ იმედს იტოვებს, რომ ყველა კომპეტენტური უწყება დაინტერესდება მომხდარით.

მომხდარზე ინფორმაცია უკვე გაავრცელა ტელეკომპანია "მე–9 არხმაც".

[ნინო ნარიმანიშვილი, ახალციხე]