შსს: ახალციხეში მომხდარი ინციდენტის გამოძიებას განსაკუთრებულ ყურადღებას მივაქცევთ

”დაზარალებულმა წუხელ მისცა ჩვენება. ყველას დაკითხვა მოხდება. მინიმუმ, გამოძიებამ უნდა დაადგინოს ვინ უნდა დაკითხოს. მაგრამ მე რამდენადაც ვიცი, დღეს დილას დაგეგმილი იყო შემთხვევის ადგილის დათვალიერება, რომ ენახათ სად მოხდა, ადგილზე რამე კვალი თუ არის. ამ გამოძიებას ჩვენ განსაკუთრებულ ყურადღებას მივაქცევთ”, - განაცხადა ხუციშვილმა.

შეგახსენებთ, რომ ურაველი-მუსხის გზაზე ინცინდენტი გუშინ, 27 ოქტომბერს მოხდა. როგორც „ნაციონალური მოძრაობის“ აქტივისტი ნიკოლოზ ხიზაძე ჰყვება, მათი კანდიდატი მთელი დღის განმავლობაში სოფლებში წინასაარჩევნო კამპანიას აწარმოებდა, რა დროსაც მათ თეთრი ფერის მსუბუქი ავტომობილი დაყვებოდა. აღნიშნული ნიკოლოზ ხიზაძემ ვიდეოზე დააფიქსირა, რის შემდეგაც ხიზაძის მანქანას, სამცხე-ჯავახეთის გუბერნატორის აკაკი მაჭუტაძის მანქანა წამოეწია. მანქანიდან "კეთილმოწყობის სამსახურის" ყოფილი უფროსი გიორგი ბალიაშვილი გადმოვიდა, მას ფიზიკური შეურაცხყოფა მიაყენა და კამერა წაიღო.

ხიზაძის მტკიცებით, ინცინდენტი ახალციხეში დაბრუნებამდე კიდევ განმეროდა. გუბერნატორმა აკაკი მაჭუტაძემ და გიორგი ბალიაშვილმა, მას სიტყვიერი და ფიზიკური შეურაცხყოფა კიდევ მიაყენეს.

ფაქტი, გუშინვე კატეგორიულად უარყვეს აკაკი მაჭუტაძემ და გიორგი ბალიაშვილმა.

შსს-მ საქმეზე ძიება, სისხლის სამართლის კოდექსის 178-ე მუხლით დაიწყო, რაც ძარცვას გულისხმობს. აღნიშნული ქმედება ისჯება თავისუფლების აღკვეთით ვადით შვიდიდან თერთმეტ წლამდე.

მომხდართან დაკავშირებით სამართალდამცველები ნიკოლოზ ხიზაძეს გუშინ საღამოს, სამი საათის განმავლობაში ჰკითხავდნენ. „ნაციონალური მოძრაობის“ აქტივისტმა, ახალციხის რაიონული სამმართველო წუხელ დაახლოებით 22:30 საათზე დატოვა. როგორც დაკითხვიდან გამოსულმა ხიზაძემ განაცხადა, სამართალდამცველებმა მისგან ინციდენტის შესახებ დეტალური ინფორმაცია მიიღეს.

[sknews.ge]