ახალქალაქის კოლეჯი რეორგანიზაციის მოლოდინში

საქართველოს მთავრობის 416-ე დადგენილების მიხედვით, ახალციხის სახელმწიფო სასწავლო უნივერსიტეტისა ახალქალაქის უმაღლესი საგანმანათლებლო დაწესებულების - კოლეჯის რეორგანიზაციის შედეგად 2012 წლის 1 ნოემბრამდე სამცხე-ჯავახეთის სახელმწიფო სასწავლო უნივერსიტეტიუნდა ჩამოყალიბდეს.

კოლეჯის რექტორი, პროფესორი როინ ყავრელიშვილი ამბობს, რომ ცვლილებების შესახებ მათთვის ოფიციალურად ჯერ არ უცნობებიათ.
`ბრძანების თანახმად, გაერთიანება საქართველოს განათლებისა და მეცნიერების სამინისტრომ უნდა უზრუნველყოს. ჩვენ ჯერ არაფერი ვიცით, არანაირი წერილი არ მიგვიღია. ეს ჯერჯერობით მხოლოდ გადაწყვეტილების დონეზე რჩება. ამ ეტაპზე ჩვეულებრივ ვმუშაობთ~, - აცხადებს იგი.

საკითხი ახალქალაქისა და ახალციხის უმაღლესი სასწავლებლების ბაზაზე სამცხე-ჯავახეთის სახელმწიფო უნივერსიტეტის გახსნის შესახებ ჯერჯერობით ღიად რჩება. არც კოლეჯისა და არც ახალციხის უნივერსიტეტის რექტორი ამ დრომდე, როცა დადგენილებაში აღნიშნულ ვადამდე 10 დღე რჩება, ოფიციალურად ინფორმირებულნი არ არიან. ამასთან, რეორგანიზაციისა და ახალი უმაღლესის ჩამოყალიბების გადაწყვეტილება წინა მთავრობამ მიიღო, მოახდენს თუ არა მის რეალიზებას ახალი მთავრობა – ეს კითხვაც ჯერჯერობით უპასუხოდ რჩება.

დადებით გავლენას იქონიებს თუ უარყოფითს რეორგანიზაცია ახალქალაქის კოლეჯზე, როინ ყავრელიშვილს შეფასება უჭირს. თუმცა, ამბობს, რომ ამით კოლეჯის სტატუსი ამაღლდება.

ახალციხის კოლეჯში აქტიური სტუდენტების რიცხვი, რომლებიც მეცადინეობებს მუდმივად ესწრებიან, 45-ით განისაზღვრება. თუმცა, სიებში ცოტა მეტი ადამიანი ირიცხება. სტუდენტთა 90% ადგილობრივია.

ახალქალაქის კოლეჯს აკრედიტაცია 2012 წლის 8 იანვრამდე აქვს. აკრედიტაციის გაგრძელების საკითხთან დაკავშირებით კოლეჯში კომისია იყო ჩამოსული, რომელიც, რექტორის თქმით, კმაყოფილი დარჩა. თუმცა, აკრედიტაციის გაგრძელების გადაწყვეტილების შესახებ კოლეჯში არაფერი იციან.

[შუშან შირინიანი, ახალქალაქი]