ახალქალაქში, თბილისი-ახალქალაქი-ყარსის რკინიგზის მშენებლობის პროექტის ფარგლებში, მსხვილი სარკინიგზო სადგური შენდება. მშენებლობაზე ძირითადად ჩამოსული სპეციალისტები მუშაობენ. როგორც კი სადგური ამუშავდება, ცხადია, რკინიგზის მომსახურე პერსონალის აუცილებლობა გაჩნდება.
ახალქალაქის კოლეჯის ხელმძღვანელობამ ბაზრის შესწავლის შედეგად სარკინიგზო გადაზიდვების სასწავლო პროგრამის შექმნა გადაწყვიტა.
კოლეჯის რექტორის, პროფესორ როინ ყავრელიშვილის თქმით, ამ პროგრამის გარდა, კიდევ რვა პროგრამა აქვთ დაწერილი: რკინიგზაზე მომუშავე სპეციალისტების, ელექტრიკოსებისა და შემდუღებელთა მომზადებისა და კიდევ რამდენიმე სხვა. ამ პროგრამების სააკრედიტაციო ცენტრში წარდგენას მომავალი წლისთვის გეგმავენ.
"დაახლოებით 20-30 მსურველი აბიტურიენტი გვყავდა, ამიტომ პროგრამა დავწერეთ და განათლების სამინისტროს ვაცნობეთ. ეს უბრალოდ ჩვენი სურვილი იყო. ვიფიქრეთ, რომ თუ ასეთი პროგრამები გვექნება და კურსებს რკინიგზის სპეციალისტთა მიმართულებით გავხსნით, მეტი სტუდენტი გვეყოლება", - ამბობს იგი.
კოლეჯის პროგრამით, ამ კურსებზე სწავლება ცხრათვიანი უნდა ყოფილიყო და ვაუჩერული სისტემით უნდა წარმართულიყო.ახალქალაქში ასეთ კურსებზე მოთხოვნა დიდია, რადგან ბევრი უმუშევარი ამაში ხანგრძლივი და საიმედო სამსახურის შოვნის შესაძლებლობას ხედავს. ახალქალაქის მოსახლეობამ "სამხრეთის კარიბჭის" ახალქალაქის ოფისსაც კი მიმართა კოლეჯში მსგავსი კურსების არსებობისა და ამ კურსებზე მოხვედრის შესაძლებლობის საკითხთან დაკავშირებით.
თუმცა კოლეჯს აღნიშნული საკითხის დამოუკიდებლად გადაწყვეტის შესაძლებლობა არ აქვს. კოლეჯში რკინიგზის მესამე ხარისხის გადამზიდავთა სასწავლო პროგრამის გასახსნელად მატერიალურ-ტექნიკური ბაზა არ არსებობს. ხელმძღვანელობა მიიჩნევს, რომ ამაში მათ სახელმწიფო უნდა დაეხმაროს, საწინააღმდეგო შემთხვევაში კურსების გახსნას ვერ შეძლებენ, რადგან კოლეჯს საკმარისი ფინანსური სახსრები არ გააჩნია.
ასეთი კურსების გასახნელად კოლეჯს უნდა ყავდეს კვალიფიციური პედაგოგები, სპეციალისტები, რომლებსაც საქმე ეცოდინებათ, შესაბამისი განათლებაც ექნებათ და სწავლებასაც შეძლებენ. როინ ყავრელიშვილის თქმით, რაიონში 3-4 სპეციალისტი მოინახა, თუმცა, კოლეჯში მუშაობაზე ყველა არ დათანხმდა.
კოლეჯის ხელმძღვანელობამ ამ კურსების გახსნის საჭიროების თაობაზე საქართველოს მთავრობასა და განათლების სამინისტროს წერილობით და სიტყვიერადაც აცნობა.
მათ იმედი აქვთ, რომ 2013 წელს მთავრობა კურსებს დააფინანსებს, თუმცა, დღეს ეს, ისევე როგორც ბევრი სხვა საკითხი ახალი მთავრობის ფორმირებისა და მათი გადაწყვეტილებების მოლოდინში, შეჩერებულია.
`ჩვენ ეს პროცესი სანახევროდ გავიარეთ. ახლა, თუ ახალი მთავრობა აღნიშნულ საკითხზე მუშაობას გააგრძელებს, 2013 წელს სტუდენტების მიღებას დავიწყებთ. საკითხი ჯერჯერობით შეჩერებულია, არ ვიცით, ახალი მთავრობა რას გადაწყვეტს. ჩემი ბრძოლა ამაოა, თუ სახელმწიფო პრიორიტეტულად მიიჩნევს, თუ მოთხოვნას დაინახავენ, თავად გახსნიან. მათ ეს ინფორმაცია აქვთ. ჩამოყალიბდება ახალი მთავრობა და ჩვენგან ინფორმაციას კიდევ ერთხელ მიიღებენ~, - ამბობს რექტორი როინ ყავრელიშვილი.
ახალი მთავრობა მალე საბოლოოდ ჩამოყალიბდება. მალე ისიც გაირკვევა, რა სტატუსით და ფორმით გააგრძელებს კოლეჯი ფუნქციონირებას. იქნება თუ არა სარკინიგზო სადგურზე მუშაობისთვის მოქლაქეების მომზადების საშუალება კოლეჯში, (რომელიც, 1 ნოემბრიდან ახალციხის სახელმწიფო სასწავლო უივერსიტეტს უნდა შეუერთდეს და სამცხე-ჯავახეთის სახელმწიფო უნივერსიტეტად ჩამოყალიბდეს), მხოლოდ ამის შემდეგ გახდება ცნობილი.
[შუშან შირინიანი, ახალქალაქი]