ტარიელ ლონდარიძე: თვითკმაყოფილი უმრავლესობა ნამდვილად ვერ არგებს ქვეყნის მომავალს [Video]

„იქნებ თქვენც დაინტერესდეთ და ჩახედოთ რეგიონში მცხოვრებ მოსახლეობას, თქვენს ამომრჩეველს და კითხოთ, რატომ არიან ისინი ასეთ მდგომარეობაში. ნუთუ მართლა გჯერათ იმის, რომ რეგიონებში ცხოვრება დუღს და 2012 წელზე კარგად მიდის, უკეთესი შემოსავალი აქვთ და უკეთესი სიმდიდრე შეიძინეს ამ სამი წლის განმავლობაში“, – განაცხადა პარლამენტში სიტყვით გამოსვლისას ტარიელ ლონდარიძემ.

მან უმრავლესობას მოუწოდა, რომ „თავი გამოყონ შენობებიდან“ და ჩავიდნენ რეგიონებში: „იქნებ რაიმე იმედი მაინც მისცეთ მათ, თუ რა ელით მომავალ მეოთხე წელს თქვენი ხელისუფლების პირობებში. ასეთი თვითკმაყოფილი უმრავლესობა ნამდვილად ვერ არგებს ქვეყნის მომავალს“.



მისივე თქმით, მიუხედავად მისი არაერთი მოთხოვნისა ასპინძის მუნიციპალიტეტში გაზიფიცირების პროცესი ჯერ კიდევ არ დასრულებულა.

„სამი წელია ენერგეტიკის სამინისტროსგან ველით და გაზიფიცირების პროცესი ვერ დაასრულეს ერთ პატარა დაბაში. სამი წელია ვიღებ წერილებს, რომ სექტემბერში დასრულდება. ვეკითხები ჩემს ასპინძელებს, დასრულდა გაზიფიცირება? არ დასრულებულა. დაიწყო, რომელიმე სოფლის გაზიფიცირება? არ დაწყებულა. დაასრულა ამ ხელისუფლებამ სამი წლის განმავლობაში სასმელი წყლით უზრუნველყოფა, არ დაუსრულებია, ასპინძის მოსახლეობა ისევ დაბინძურებულ წყალს მოიხმარს“, – განაცხადა ტარიელ ლონდარიძემ და დაამატა, რომ დროა უმრავლესობა გონზე მოვიდეს და იგრძნოს, რომ ხელისუფლებაშია.


[თამარ თოთაძე, ახალციხე]