ახალციხის მუნიციპალიტეტის გამგეობამ 8 თვეში კულტურული ღონისძიებებისთვის 15,648 ლარი დახარჯა

ახალციხის მუნიციპალიტეტის გამგეობის კულტურის სამსახურს, ადგილობრივი ბიუჯეტიდან, კულტურული ღონიძიების ჩასატარებლად 46,100 ლარი აქვს გამოყოფილი. აქედან 15 ,648 ლარი უკვე დაიხარჯა.

კულტურის სამსახურმა ღონისძიებების ჩატარება თებერვლიდან დაიწყო. 2015 წლის 13 თებერვალს, მუნიციპალიტეტის თემის ახალგაზრდების შორის, „მაგიდის ჩოგბურთი“ ჩატარდა. სპორტული ღონისძიების ჩასატარებლად 250 ლარი დაიხარჯა.

33 კულტურული ღონისძიებიდან, რომელიც ახალციხის მუნიციპალიტეტის გამგეობამ 8 თვის განმავლობაში ჩაატარა, ყველაზე დიდი თანხა 27 მაისს, სოფელ სხვილისში გამართულ „ბოლო ზარისთვის“ დაიხარჯა. მუნიციპალიტეტის სკოლების კურსდამთავრებულებისთვის წიგნების შეძენა, „ფურშეტი“ და ტრანსპორტირება 2,812 ლარი დაჯდა.

2203 ლარი დაუჯდა კულტურის სამსახურს აგვისტოს თვის ბოლო ღონისძიება, ორდღიანი ექსკურსია–ლაშქრობა სოციალურად დაუცველი და წარმატებული ახალგაზრდების მონაწილეობით.

ყველაზე ნაკლები თანხა კი 2015 წლის 9 აპრილს, საქართველოს ერთიანობისათვის დაღუპულ გმირების ხსენების დღისადმი მიძღვნილ ღონიძიებაში დაიხარჯა. ამ დღეს მხოლოდ 50 ლარის ყვავილები შეიძინეს.

[ვარლამ წიკლაური, ახალციხე]